Ausilio e konfirmon, Interi në bisedime për të nënshkruar me dy lojtarë

Drejtori sportiv i Interit, Piero Ausilio, ka konfirmuar se zikaltrit janë në bisedime për të nënshkruar me dy lojtarë si transferim pa pagesë, ku kuptohet se bëhet fjalë për Mehdi Taremin dhe Piotr Zielinskin. Ai gjithashtu është shfaqur i bindur se Lautaro Martinez e Nicolo Barella do të nënshkruajnë kontratat e reja.

Ausilio foli me gazetarët italianë të mërkurën pas ngjarjes 'Amico dei Bambini' në Milano.

Drejtori sportiv i zikaltrëve konfirmoi se klubi është i bindur se Lautaro Martinez, golashënuesi më i mirë i Interit këtë sezon, do të nënshkruajë një kontratë të re, duke zgjatur qëndrimin e tij në Stadio Meazza përtej vitit 2026.

“Ka besim sepse ne kemi të njëjtin qëllim nga të dyja palët”, tha Ausilio, cituar nga Gazzetta.

“Të dy palët duam të zgjasim marrëveshjen dhe natyrisht, bisedimet janë në vazhdim, kështu që nevojitet durim. Kemi momente të ndryshme nga fansat dhe mediat, por jam i sigurt se do të arrijmë një marrëveshje që kënaq të dyja palët. Kjo është ajo që ne duam. Ajo që thashë për Lautaron, është gjithashtu e vërtetë për Barellan dhe rinovimet e të gjithë lojtarëve të tjerë të rëndësishëm. Kemi shumë. Ne filluam me ato më urgjente që po skadonin dhe po vazhdojmë me planet afatgjata për Barella dhe Lautaro.”

Interi është në bisedime për të nënshkruar me Taremin dhe Zielinski për transferime të lira dhe Ausilio dha përditësimet më të fundit për dy marrëveshjet e mundshme.

“Ne jemi duke punuar në këto situata; ne nuk na pëlqen të imponojmë një kohë; askush nuk ka ultimatum. Ne kemi informuar klubet e tyre se negociatat janë në vazhdim, do të shohim nëse bisedimet do të sjellin diçka zyrtare”.

Zikaltrit do të takohen me ish-sulmuesin e tyre Romelu Lukaku dhe ish-objektivin e transferimit Paulo Dybala në një ndeshje kyçe të Serie A kundër Romës në Stadio Olimpico këtë të shtunën e ardhshme.

“Ne nuk luajmë kundër Dybala dhe Lukaku. Ne luajmë kundër Romës, një skuadër e fortë që ka fituar tre ndeshjet e fundit. Ata kanë ndryshuar trajner, ne do të luajmë në një stadium të mbushur, por Interi do të jetë i vendosur të vazhdojë rrugën e saj”.

Interi është kryesuesi aktual i tabelës me katër pikë epërsi ndaj Juventusit dhe një ndeshje më pak. Skuadra e Simone Inzaghit ka fituar 18 ndeshje nga 22 në Serie A këtë sezon.