Arsenali e dëshiron në janar sulmuesin e pezulluar për baste Ivan Toney

Arsenali është e vendosur se dëshiron të nënshkruajë që në janar me sulmuesin e Brentford, Ivan Toney, por kjo nuk do të jetë aspak e lehtë, pasi përballen me sërë pengesash për t'u arritur një marrëveshje e tillë.

Skuadra londineze ka qenë pas sulmuesit të bletëve për disa kohë, por është detyruar të presë deri në janar për ta nënshkruar atë për shkak të ndalimit tetë-mujor që iu dha në maj për shkelje të rregullave të basteve. Topçinjtë janë gati të bëjnë një lëvizje për Toney, por ata do të duhet të paguajnë rreth 80 milionë funte (102 milionë dollarë) për të bindur Brentford për të shitur. The Independent raporton se rregullat e Fair Play Financiar të Premierligës e bëjnë atë një transferim të vështirë për t'u realizuar.

Topçinjtë thuhet se ishin tashmë afër kufirit të FFP-së në dritaren e verës, gjë që e bën çdo biznes të janarit mjaft të komplikuar. Toney, i cili ka shënuar 32 gola në 66 ndeshje në Premierligë për Brentford, nuk është i vetmi sulmues që ata kanë parë. Opsioni alternativ Victor Osimhen do të jetë një nënshkrim edhe më i shtrenjtë se Toney, megjithatë, nigeriani është zotuar për një kontratë të re me Napolin deri në vitin 2026.

Trajneri Mikel Arteta dëshiron të forcojë opsionet e tij në disa pozicione për të ndihmuar skuadrën për të fituar titullin e Premierligës. Spanjolli po kërkon një mesfushor të ri dhe dy mbrojtës të krahut si dhe një sulmues, por i ka dhënë përparësi këtij të fundit për shkak të vështirësive të skuadrës së tij para portës.

Skuadra e Londrës veriore është e dyta në Premierligë - dy pikë pas Liverpool - dhe Arteta do të shpresojë të ketë lojtarë të rinj së shpejti për të parandaluar gabime të mëtejshme si humbja 2:0 në shtëpi kundër West Ham të enjten në mbrëmje.