Salihu ironizon me reagimet kundër fjalimit të Ramës: Udhëtim në kohë

Opinionisti Fitim Salihu, ka ironizuar me reagimet kundër fjalimit të kryeministrit të Shqipërisë, Edi Rama në Parlamentin Evropian.

Fjalimi i Ramës, i cili për epiqendër pati mbrojtjen e liderëve të UÇK-së, të cilët po mbahen në paraburgim në Hagë, ngjalli shumë reagime përkrahëse në Kosovë.

Por, megjithatë ishte edhe një numër i konsiderueshëm, kritikësh, të cilët fjalimin e Ramës e quajtën pa efekt, e mashtrues.

Salihu, këtë situatë e ka përshkruar me ironi, duke pretenduar një udhëtim në kohë, ku “e shpallë” armiqësor fjalimin e Ramës, gjithnjë duke pretenduar se shkrimi po bëhet nga Kosova, si pjesë e Jugosllavisë.

Statusi i Salihut:

“Mirëmëngjesi, udhëtim në kohë! Zvanična Tirana vetëm po e nxit irredentizmin dhe separatizmin në Kosmet. Ajo nuk ka asnjë të drejtë të përfshihet në temat e brendshme të Pokrajinës sonë. E dënojmë fjalimin e fundit armiqësor të liderit shqiptar mbajtur në Kukës dhe transmetuar nga Radio Tirana. Kalojmë me lajmet nga sporti: Sot Kombëtarja jugosllave në kosharkë do të ndeshet me... Siç raporton Tanjugu, "pllavit" tanë do të luajnë në kuadër të eliminatoreve... Ju dëshirojmë ditë të mbarë me një pikë muzikore!”