Era e rrëzon kulmin e objektit të komunës së re të Prishtinës: Dyshohet për të lënduar

Një ngjarje tragjike po dyshohet se ka ndodhur në komunën e Prishtinës.

Si pasojë e erërave të forta, kulmi i objektit të komunës së re të Prishtinës në lagjen ‘Arbëria’ është rrëzuar.

Sipas raportimeve të para nga vendi i ngjarjes, kulmi dyshohet se e ka zënë një person.

Sipas burimeve të Nacionales, kulmi e ka zënë një qytetare e cila është marrë për trajtim mjekësor nga ekipet mjekësore.

"Një vajzë e ka zënë kulmi, dhe është marrë nga ekipet emergjente për trajtim", ka thënë ky burim.

Se është dërguar në Emergjencë për trajtim, e ka konfirmuar edhe mjeku Naser Syla.

Për momentin, nuk dihet natyra e lëndimeve.

Qendra e Mjekësisë Urgjente në Prishtinë e ka konfirmuar për Gazetën Shneta se nuk ka të vdekur nga rënia e kulmit të objektit të komunës së Prishtinës në lagjen Arbëria.

Drejtori i QMU-së Dr. Avdyl Pacolli ka dhënë detaje nga intervenimi i ekipit mjekësor të këtij institucioni në vendin e ngjarjes.

“Është një grua e lënduar. Ka pësuar politraumë dhe traumë të shumëfishtë në ekstremitete. Një plagë në kokë. Pacientja është stabilizuar në vendin e ngjarjes dhe me parametra stabil është dërguar në Emergjencën e QKUK-së”, ka bërë të ditur Avdyli.

Nacionale po pret përgjigje nga Policia e Kosovës dhe Qendra Klinike Universitare e Kosovës.

Lajmin e ka konfirmuar edhe Policia e Kosovës.

“Rreth orës 13:00, është raportuar se në rrugën ‘Nora e Hotit’ në Prishtinë, një person ka marrë lëndime si pasojë e goditjes nga materiale që janë shkëputur nga çatia e një objekti. Policia menjëherë ka dalë në vendin e ngjarjes dhe mbështetur në informacionet e para është raportuar për një person të lënduar, femër, e cila është dërguar në QKUK për trajtimin e nevojshëm mjekësor”, ka thënë Agron Borovci.