42 vjeçari nga Maqedonia vret bashkëshorten dhe i dorëzohet policisë në Zvicër
Po raportohet se në Zvicër një burrë 42 vjeçar ka vrarë bashkëshorten e tij 39 vjeçare. Të dy shtetas të Maqedonisë së Veriut.
Policia e Kantonit Thurgau ka gjetur një grua 39 vjeçare të pajetë në një banesë në Erlen, Kantoni TG, për të cilën supozonte se ishte e vrarë, transmeton albinfo.ch. Pak pas orës 11:00, një burrë ka telefonuar në qendrën kantonale të thirrjeve të urgjencës, për të treguar se kishte plagosur për vdekje gruan e tij.
Sipas raportimeve, i dyshuari është arrestuar menjëherë. Prokuroria publike ka nisur një hetim penal ndërsa policia ka nisur hetimet.
Burimet e albinfo.ch konfirmojnë se bëhet fjalë për një çift shqiptrar nga Maqedonia e Veriut. Çifti kanë tri vajza adoleshente.
Duket të ketë pasur debate të përsëritura ditët e fundit mes çiftit, thotë një i afërm, sipas të cilit, divorci mes tyre ishte i afërt.
Burri kohët e fundit ka qenë i paaftë për të punuar për shkak të një sëmundjeje, shkruan albinfo.ch.
“Kjo e shqetësonte atë”, thotë më tutje i afërmi. “Dikur ishin shumë të lumtur, qeshnin shumë. Por në javët e fundit marrëdhënia mes tyre është përkeqësuar”.
“Jemi në shok”, thotë një fqinj. Ai e përshkruan të dyshuarin si “një person të sinqertë, të këndshëm dhe normal”. Ai qeshte shpesh dhe ishte në disponim të mirë. Por në ditët e fundit ai kishte ndryshuar. “Ai nuk na përshëndeste më dhe mezi fliste”.
