Stoltenberg shpreh mirënjohjen ndaj Erdogan për përforcimin e KFOR-it në veri të Kosovës
Tensionet e fundit në veri të vendit, kanë bërë që Aleanca më e madhe në botë, ajo e NATO-s, të mobilizohet. Së fundmi u vendos që numri i ushtarëve turq si pjesë e KFOR-it, të rritet.
Tashmë ushtarët janë nisur drejt Kosovës. Për këtë, i pari i NATO-s, Stoltenberg e ka falënderuar Presidentin turk Tayyip Erdogan, duke shtuar se kontributi i Turqisë për mirëmbajtjen e paqes në rajon është shumë i rëndësishëm.
Shefi i NATO-s ka shprehur mirënjohjen për mbështetjen e Turqisë në dërgimin e përforcimeve në Kosovë gjatë një takimi në Stamboll me presidentin turk Rexhep Tajip Erdogan.
Stoltenberg duke folur për gazetarët pas takimit me dyer të mbyllura me Presidentin Erdogan në zyrën presidenciale të Dolmabahçes të dielën tha: "Falënderoj Turqinë për dërgimin e përforcimeve në veri të Kosovës pas trazirave të fundit”.
NATO chief Stoltenberg:
— TRT World (@trtworld) June 4, 2023
- KFOR & NATO will take all necessary precautions for safety of Kosovar people
- Welcome decision by Türkiye to provide additional forces to KFOR
- Will deploy around 700 more NATO troops & Türkiye is leading the effort of providing extra forces pic.twitter.com/4Ev3emvRUJ
Stoltenberg mori pjesë në ceremoninë e inaugurimit të Erdoganit dhe shfrytëzoi rastin për ta uruar atë për rizgjedhjen e tij të dielën e kaluar dhe pjesëmarrjen e lartë të votuesve.
Gjatë takimit të tyre, të dy liderët diskutuan gjithashtu çështje të rëndësishme që do të diskutohen në korrik në samitin e NATO-s në Vilnius, Lituani.
Ndër temat janë mbështetja e palëkundur e NATO-s për Ukrainën, përforcimi i masave të parandalimit dhe mbrojtjes dhe rëndësia e pranisë së NATO-s në Kosovë, shtoi ai.
Ushtarët turq nisen drejt Kosovës
Një grup i ushtarëve turq të misionit KFOR janë nisur të dielën drejt Kosovës pas rritjes së tensioneve në veri.
NATO ka vendosur ta forcojë misionin e KFOR-it me 700 trupa shtesë, ndërsa është vendosur një batalion tjetër në gatishmëri po ashtu.
Autoritetet turke kanë thënë se pas ngjarjeve të fundit në Kosovë, batalioni i Brigadës 65 të Mekanizuar të Këmbësorisë, është nisur drejt Kosovës.
“Pas ngjarjeve që ndodhën në Kosovë, batalioni komando i Komandës sonë të Brigadës së 65-të të Mekanizuar të Këmbësorisë (Lüleburgaz) i caktuar në rajon filloi të shpërngulet në Kosovë”, thuhet në postimin e publikuar në Tëitter.
“Pas ngjarjeve që ndodhën në Kosovë, një batalion i lidhur me Komandën tonë të Brigadës 65-të të Mekanizuar të Këmbësorisë, që më parë ishte caktuar në Forcën e NATO-s në Kosovë (KFOR), si njësi rezervë. Kërkesa për t’u dërguar është bërë nga Komanda e Forcave të Përbashkëta të NATO-s”, është thënë nga Ministria e Mbrojtjes e Turqisë.
KFOR-i qorton Kurtin
“KFOR’i nuk është çadër për t’u strehuar pas veprimeve të njëanshme”. Kështu iu drejtua Kryeministrit të Kosovës, Albin Kurtit, komandanti i Misionit Paqeruajtës të NATO’s në Kosovë, Gjeneral Majori italian, Angelo Michele Ristuccia duke folur për gazetën italiane “Corriere”. Në intervistën e tij të dytë brenda tri ditësh dhe pas plagosjes së rreth 30 ushtarëve të KFOR'it (11 prej tyre italianë) në Zveçan të hënën, Ristuccia i kishte mprehur tonet. Ditë më parë, Ristuccia i tha gazetës italiane “la Repubblica” diçka tejet të frikshme për nga tingëllima: Se po të mos ishte për intervenimin e KFOR’it të hënën, “do të ishim duke mbajtur zi për të vdekur”. Këtu ai kishte ndërmend viktima të mundshme nga Njësitet Speciale të Kosovës dhe protuestuesve sulmues barbarë.
Tashmë Ristuccia nuk do t’i kursente fjalët dhe do të lëshohej në vlerësime politike për të identifikuar kush-është-fajtor-për-çka. Me emër të përvetshëm e shënoi Albin Kurtin, e madje edhe përtej. “Që nga 2021 vetëm hapa mbrapsht”, tha ai, derisa vlerësoi se janë bërë përpjekje të mëdha njëzet vjeçare për të arritur “rezultate të rëndësishme”. Këtu komandanti e pranoi se nuk është punë e tij të bëjë vlerësime politike, por se në këso rastesh ku prodhohen pasoja s’ka se si të mos bëjë konstatime të tilla.
Të hënën, tha Rusticcia, “shmangëm një tragjedi”. Shpjegimi i tij ishte kësisoji se pse erdhën siç erdhën gjërat: për shkak të vendimit “të dytë të njëanshëm” të qeverisë kosovare “për të përdorur forcën pa u konsultuar me ne”.
Fjalia e tij do të zhveshej nga ato të zakonshmeve të KFOR’it. Tash ai do t’u binte toneve që pasqyrojnë dritën reale të gjendjes në terren: “Për të qenë edhe më i saktë, them se nëse sot nuk jemi këtu për të mbajtur zi për të vdekurit në mesin e popullatës serbe apo në mesin e policëve shqiptarë etnikë, kjo është për shkak se KFOR-i ndërhyri dhe arriti të rivendosë qetësinë”.
Para mëse tri ditësh, Komandanti i KFOR’it, kishte fajësuar dhe tërhequr vërejtjen të dyja palëve me një kërkesë: Merrni përgjegjësi, mos u fshini para narrativave të rremë. Ishte e padëgjuar më parë që një udhëheqës i forcës paqeruajtëse të jepte konstatime të kësaj natyre.
Në nëntor të vitit të kaluar, edhe ish-Komandanti hungarez i KFOR’it kishte dhënë disa detaje të një krize tjetër në veri asokohe, për çka pati treguar se si i kishte bërë thirrje kryeministrit kosovar, që asokohe të shihej operimi me një forcë speciale konsensuale. Kurti ia kishte kthyer prerazi se “unë nuk negocioj me kriminelë”.
“Qëllimi ka qenë të formojnë njëfarë konsensusi, pasi që edhe serbët e Kosovës kanë interes të eliminojnë grupet aktuale kriminale. Qëndrimi i Qeverisë së Kosovës, sidoqoftë, ishte se ne nuk negociojmë me kriminelë dhe se policia kryen operacionet e saj ashtu siç u shkojnë për shtati”, pati treguar Ferenc Kajari për median hungareze “Honvedelem”.
Këtu, edhe Ristuccia do të tregonte saktësisht për “kokëfortësinë” e kohëve të fundit, sipas tij, të treguar nga qeveria kosovare.
“Kokëfortësia e autoriteteve vendore shqiptare për të mos vepruar sipas indikacioneve të marra nga partnerët perëndimorë, indikacione që shërbejnë për të lehtësuar dialogun veçanërisht në dritën e progresit të bërë me marrëveshjet në Bruksel dhe Ohër, ka dobësuar shumë ekuilibrin”, i tha ai ditë më parë gazetës italiane “la Repubblica”.
Njëjtë do të shprehej edhe në intervistën e tij të fundit të dhënë mbrëmjen e së shtunës. “Veprimi i dytë i njëanshëm i qeverisë së Prishtinës ishte përdorimi i forcës pa u konsultuar me ne, duke bërë kështu të nevojshme ndërhyrjen tonë për të shmangur një tragjedi”.
Kurti, i cili asobote opozitare shprehej nga foltorja e Kuvendit të Kosovës se “KFOR’i mbron Rezolutën 12/44” dhe se “KFOR’i nuk mbron pavarësinë e Kosovës” dhe se “kufjtë i Kosovës i sheh si vijë administrative e jo si kufij ndërshterorë”, megjithatë, tash në çdo paraqitje të tij kërkon nga NATO që të dislokojë më shumë trupa në Kosovë brenda kësaj Rezolute 12/44, rezolutë kjo e vitit 1999 që ende e ka të shkruar Kosovën si “pjesë integrale të Republkës Federale të Jugosllavisë” dhe e cila rezolutë nuk është zhbërë asnjëherë, për shkak të vetos ruse dhe kineze, dy shtete këto anëtare të përhershme të Këshillit të Sigurmit të OKB-së.
