S’kalon as një ditë: Dimal Basha intimidon gazetaren e RTK-së, AGK-ja dënon rastin
Nuk kanë kaluar as 24 orë prej publikimit të raportit të Reporterëve pa Kufij ku Kosova ka shënuar regres duke rënë për 19 pozita. Megjithatë, deputeti i Lëvizjes Vetëvendosje, Dimal Basha, ka intimiduar gazetaren e RTK-së, Blerta Foniqi – Kabashi, e cila po e intervistonte.
AGK-ja ka dënuar këtë rast për të cilin më herët raportoi edhe Nacionale.
“Deputeti Dimal Basha e ka krahasuar Transmetuesin Publik, RTK me televizionin shtetëror serb, RTS kur është pyetur nga gazetarja Blerta Foniqi Kabashi për kushtin e Asociacionit për anëtarësim e Kosovës, në Këshillin e Evropës.” – thuhet në njoftimin e AGK-së.
Ndërkohë, deklarata e Bashës ishte si vijon:
“Për besë unë e shoh qysh e shoh secili shqiptar. Në RTS-in e Serbisë ata mujnë me pas shqetësim kryesor Asociacionin . Në RTK-në e Kosovës nuk duhet me kane veç Asociacioni…A ta shpjegova që ka marrëveshje Kosova? Pse po e bën temë a duhet me ba Asociacionin a jo? Na e dimë çka është tema kryesore”.
AGK-ja në fund ka thënë se e përgëzon kolegen Foniqi – Kabashi për profesionalizmin e treguar në interviste, derisa ka përmendur se Basha sulmoi edhe vetë Asociacionin gjatë së njëjtës.
