"Serbia është e kënaqur kur Kurti refuzon këshillat nga Kai Eide dhe miqtë e Kosovës", thotë Petrit Selimi

Pas intervistës së Nacionales me Kai Eide-n, ish-Përfaqësuesin Special për Kosovën i Sekretarit të Përgjithshëm të Kombevetë Bashkuara, Kofi Annan, ish-kryediplomati kosovar, Petrit Selimi, ka dhënë një historik tejet të detajuar të përfshirjes dhe raportit të Eide-s (më 2005) në çëshjet e Kosovës. Në një seri cicërimash Selimi ka shkruar se Kryeministri i Kosovës, Albin Kurti ka harxhuar kot tri vite, ka bërë zero progres në rrugën e Kosovës drejt NATO’s dhe se Serbia “është e kënaqur kur Kurti refuzon të pranojë këshilla racioanle nga Eide dhe miqtë”.

Selimi tregon se si qysh në vitin 2005, raporti i Kai Eide-s çeli rrugën për bisedimet për statusin final të Kosovës e deri në Pavarësinë e Kosovës më 2008.

“Kai Eide ishte i pari i cili përmendi nevojën për nevojën për decentralizim të pushtetit, si dhe ‘lidhjet horizontale’ për të ndihmuar në ‘përthithjen e strukturave paralele në entitete legjitime’ por ‘duke mos rrezikuar institucionet qendrore ose të dobësojë autoritetin e Prishtinës’”, ka shkruar në Twitter, Petrit Selimi.

“Kai Eide sapo bëri intervistë bindëse me Nacionalen: ‘Eide: Çka fiton Serbia duke mos e njohur Kosovën? Është non-sens i Beogradit mosmarrja e këtij hapi. Është e dhimbshme, e vështirë. Por nuk fitoni asgjë duke mos e marrë atë hap”, e ka cituar Selimi intervistën e Eide-s.