Rrëzohet një helikopter në rajonin e Kievit, vdes ministri i Brendshëm i Ukrainës

Të paktën 16 persona kanë vdekur, pasi një helikopter u rrëzua në periferi të Kievit të mërkurën, tha policia ukrainase. Në mesin e viktimave është ministri i Punëve të Brendshme i Ukrainës, Denis Monastyrsky, bëri të ditur policia.

Komandanti i Policisë Kombëtare, Ihor Klymenko, tha se nëntë persona që kanë vdekur, ndodheshin në helikopterin që u përplas në një çerdhe fëmijësh dhe në një ndërtesë banimi në distriktin Brovary, raporton televizioni CNN.

Ai shtoi se në mesin e viktimave janë dy fëmijë, ndërsa 22 persona janë dërguar në spital për shkak të lëndimeve, përfshirë dhjetë fëmijë.

“Përplasja e mbyti udhëheqësinë e Ministrisë së Punëve të Brendshme – ministrin, zëvendëskryeministrin e parë dhe sekretarin shtetëror”- tha komandanti i policisë ukrainase.

Pas përplasjes, një zjarr shpërtheu afër një çerdheje për fëmijë dhe fëmijët e stafi u larguan nga ndërtesa. Mbetjet e helikopterit ishin të dukshme jashtë ndërtesës që po digjej.

Në kohën e aksidentit ishte errësirë dhe mot me mjegull dhe raportimet fillestare sugjerojnë se helikopteri fillimisht e ka goditur çerdhen, pastaj një ndërtesë banimi.