Rënie të temperaturave në fundjavë, priten edhe reshje shiu

E shtuna do të sjellë një shtim të vranësirave, me shira që priten të fillojnë në pjesën perëndimore të vendit pasdite dhe të shtrihen në zona të tjera gjatë mbrëmjes. Herë pas here, këto shira do të shoqërohen me bubullima.

Temperaturat maksimale do të arrijnë fillimisht 30-31°C, por do të bien nën 20°C pasdite, pas afrimit të një fronti të ftohtë. Era do të fryjë mesatarisht nga jugperëndimi dhe perëndimi, me shpejtësi prej 4-12 m/s dhe me hove mbi 15 m/s.

E diela do të ketë më shumë diell, megjithëse temperaturat do të mbeten më të freskëta, duke arritur deri në 24-25°C, me mundësi të vogla për shira pasdite.

Duke filluar nga e hëna, moti do të jetë kryesisht me diell. Të martën, temperaturat do të rriten sërish mbi 30°C. Një tjetër sistem ciklonik mund të sjellë shira të mërkurën, me një rënie të lehtë të temperaturave në 28°C.

Minimalet gjatë kësaj periudhe do të luhaten midis 12°C dhe 14°C. Era do të fryjë lehtë deri në mesatare nga perëndimi dhe jugu.