Qeveria Kurti ia numëron sërish ngjarjet vetes, i harron krejt barrikadat
Qeveria Kurti ia ka numëruar vetes pesë ngjarjet kryesore të javës përsëri. Çka vlerësoi tash?
Duket se koncepti i ‘ngjarjes’ sipas Qeverisë Kurti II është më i ngushtë se sa e jep fjalori ynë apo çfarëdo fjalori tjetër. Shumë e shumë ngjarje të rëndësishme, përnjëmend të rëndësishme, nuk janë futur në këtë listë.
Fillimisht, të ndalemi e të shohim se çka ka vlerësuar Qeveria Kurti II e më pas të shohim edhe çka kanë harruar të vlerësojnë.
Ngjarjet sipas Qeverisë Kurti II
Zëdhënësi i Qeverisë së Kosovës, Përparim Kryeziu, ka publikuar listën në fjalë mëngjesin e sotëm.
Ngjarja më e rëndësishme është vlerësuar të jetë aplikimi i Kosovës për anëtarësim në Bashkimin Evropian – e bërë bashkë me ngjarjen tjetër që institucionet e BE-së u pajtuan për heqjen e regjimit të vizave për qytetarët e Kosovës, më së largu me 1 janar 2024.
Kjo e fundit, natyrisht se është një ngjarje e rëndësishme, por se si mund të futen dy ngjarje në një e të konsiderohen një ngjarje momentalisht nuk dihet.
Si ngjarje e dytë më e rëndësishme u vlerësua miratimi i ndryshimeve për projektligjin e Byrosë për Konfiskimin e Pasurisë së Pajustifikueshme. E treta ishte miratimi i buxhetit.
Më pas, janë vlerësuar edhe dy ngjarje të tjera të cilat deri tash Nacionale nuk ka arritur t’i verifikojë në mënyrë të pavarur: rritjen e pretenduar prej 44 për qind të eksportit të produkteve bujqësore dhe ushiqimore si dhe përfitimin e 202 mijë e 252 familjeve nga subvencionimi i dyfishtë i Qeverisë për kursim të energjisë elektrike për muajin tetor.
Çka harroi Qeveria Kurti II?
Gjatë kësaj jave kanë ngjarë shumë gjëra. Mes tyre mjaft të spikatura ishin edhe barrikadat e vendosura nga serbët lokalë në veri të Kosovës.
Kryeministri i Kosovës Albin Kurti i zbutur u shpreh se po priste KFOR-in që t’i hiqte ato barrikada. Por në anën tjetër, nuk ka asnjë ide se si të rivendoset lëvizja e lirë në komunat veriore me shumicë serbe apo të shtensionohet situata politike.
Një tjetër ngjarje e rëndësishme ishte edhe miratimi i Draft-Strategjisë për Energjinë në Qeverinë e Kosovës. Gazeta Nacionale e kishte tematizuar këtë draft-strategji, që përthekon një periudhë kohore deri më 2031, dhe e cila pa dyshim se do të meritonte më shumë vëmendje.
Një ngjarje tjetër e rëndësishme ishte edhe dënimi i komandantit Salih Mustafa, i njohur me nofkën Cali, me 26 vjeçar burg nga ana e Gjykatës Speciale. Për këtë ngjarje, foli madje edhe kryeministri i Kosovës, Albin Kurti.
