Mediat serbe pretendojnë se një kosovar helmoi 4 qen në Kishën Ortodokse në Novobërdë, policia: S'dihet ende

Katër qen janë helmuar, siç raportohet në oborrin e Kishës Ortodokse në Novobërdë, derisa mediat serbe “Politika” dhe “RadioKim” pretendojnë se kanë siguruar pamje nga momenti kur ka ndodhur kjo.

Në lidhje me këtë, ka reaguar Manastiri i Deçanit, duke pretenduar se qentë u helmuan nga një punëtor i nacionalitetit kosovar.

Manastiri i Deçanit ka apostrofuar edhe një kompani, në të cilën pretendon se punon personi në fjalë. Në videon e publikuar, shihet një person duke i ushqyer qentë.

Deri më tash, raportohet se katër qen kanë vdekur pas helmimit.

“Jemi të shqetësuar. Nuk mund ta qetësoj vetën time dhe familjen. Mora vajzën time, Milanan, e cila ishte shumë e afërt me qenin e saj në manastir. Ajo nuk mund ta shohë këtë.” – raportohet të ketë deklaruar prifti Stevo Mitriq.

Ndërkohë, në lidhje me këtë rast, Nacionale ka kontaktuar zëdhënësin e Policisë në rajonin e Gjilanit, Ismet Hashani i cili tha se nuk dihet ende nëse këto pretendime janë të vërteta.

“Policia e Kosovës ka marrë një ankesë për helmim e katër qeneve. Zyrtarët policor kanë dal në vendin e ngjarjes dhe kanë intervistuar një person. Nuk e dimë nëse është i dyshuari kryesor, por i njëjti është intervistu. Autoritetet hetimore nga stacioni policor në Novoberdë janë duke punuar për të përcaktuar nëse është e vërtetë që ai i ka helmuar apo jo. Po punohet për sigurimin e mëtejshëm të provave.” – u shpreh ai për Nacionalen.