Mbi 12 mije euro në ditë: Qe sa i kushtoi Gërvalla me staf buxhetit të shtetit në vizitën "pa hajr" në ShBA
Në fund të muajit shtator, kryediplomatja Donika Gërvalla, kryeministri Albin Kurti e presidentja Vjosa Osmani udhëtuan për në Shtetet e Bashkuara të Amerikës për të marrë pjesë në Asamblenë e Përgjithshme të Kombeve të Bashkuara. Këta dy të parët, do të mbanin atje dy tubime politike, për të vijuar më pas këtë fushatë nëpër shtetet e Evropës ku ka kosovarë. Sidoqoftë, udhëtimi i ministres së Punëve të Jashtme dhe stafit të saj, i ka kushtuar buxhetit të shtetit të Kosovës 86 mijë e 512 euro.
Sipas komunikatave të dërguara nga Ministria e Punëve të Jashtme dhe Diasporës, Gërvalla me kabinetin e saj qëndruan në ShBA për rreth një javë, nga 22 deri më 29 shtator.
Portali “Demokracia” ka publikuar shpenzimet e Gërvalles dhe stafit, të siguruara nga kërkesa për qasje në dokumente publike. Sipas të dhënave të MPJD-së, Gërvalla me staf kanë shpenzuar 86 mijë e 512 euro gjatë qëndrimit në ShBA.
Pra, me një llogaritje të thjeshtë, del se kjo vizitë e Gërvallës dhe stafit të saj, i ka kushtuar buxhetit të Kosovës rreth 12 mijë e 358 euro në ditë.
Këtu vlen të theksohet se Gërvalla është kritikuar shumë pas kësaj vizite, duke marrë parasysh mungesën e takimeve të nivelit të lartë.
Ajo ka marrë pjesë në një takim me ftesë të sekretarit amerikan, Antony Blinken për situatën në Venezeuelë dhe në Konferencën e Koalicionit Global kundër DAESH/ISIS.
Ku shkuan këto para?
Mëditjet dhe udhëtimi: 20,929.60 euro
Akomodimi: 38,416.88 euro
Shpenzimet tjera: 2,776.97 euro
Dreka dhe darka zyrtare: 1,844.00 euro
Biletat e aeroplanit: 22,550.18 euro
Krejt në fund, ministria është kujdesur të tregojë se Gërvalla me staf kanë marrë një shtëpi me qira gjatë qëndrimit atje, duke pretenduar se i kanë kursyer buxhetit të shtetit 80 mijë dollar.
“Gjatë qëndrimit në USA, kabineti i Ministres kanë marrë një shtëpi me qira, me kosto rreth 14 mijë dollarë, dhe shpenzimet e akomodimit janë shpërndarë propocionalisht bazuar në ditët e qëndrimit. Me këtë veprim, buxhetit të shtetit i janë kursyer afro 80 mijë dollarë." - thuhet aty.
Në lidhje me këto raportime, ka reaguar edhe deputetja e Partisë Demokratike të Kosovës, Ariana Musliu – Shoshi.
Ajo përmes një shkrimi në Facebook ka theksuar se këtu nuk janë përfshirë shpenzimet e Kurtit dhe stafit të tij.
“86 MIJË e 512 EURO vec një udhëtim në SHBA për Donikën me zëvendësen e saj dhe stafin! Këtu NUK janë përfshi edhe shpenzimet e Albinit dhe stafit të tij.
Ende s’keni parë gjë!
Jeni të VJEDHUR e të MASHTRUAR!” – ka shkruar deputetja e Kuvendit të Kosovës.
