LB: Me këtë koeficient Ligji për Pagat do të prodhojë pakënaqësi sociale
Lëvizja për Bashkim nuk është pajtuar me vlerën që Qeveria sot ia ka caktuar koeficientit në Ligjin për Pagat në sektorin publik.
Përmes një komunikate për medie, ky subjekt politik ka paralajmëruar se Ligji i Pagave me këtë koeficient do të prodhojë pakënaqësi sociale.
“Ka kohë që Qeveria e ka mbajtur “të fshehur” vlerën e koeficientit për pagat e sektorit publik! Dhe për këtë vërtet paska pasur arsye të fortë! Vlera e koeficienti (105) e shpallur sot as për së afërmi nuk i përgjigjet nevojave të punëtorëve të sektorit publik dhe zhvillimeve ekonomike nëpër të cilat po kalon vendi ynë. Prandaj ky ligj, respektivisht kjo vlerë e koeficienti nuk do të prodhojë qetësi sociale, por, përkundrazi do të na shpie drejt pakënaqësive sociale e dukurive tjera negative në shoqërinë tonë siç është largimi i punëtorëve nga ky sektor, apo edhe vazhdimi i braktisjes së Kosovës!”, është thënë në njoftimin e LB-së.
Sipas këtij subjekti politik, vlera e koeficientit as për së afërmi nuk përmbush pritjet e qytetarëve.
“Reagime të arsyeshme dhe të menjëhershme kanë ardhur nga shumë sektorë, si sektori i ushtrisë, policisë e ai i shërbyesve civil! Politika e pagave të ulëta e pastaj ndihmave të qeverisë është një politikë e mjerimit dhe e nëpërkëmbjes së dinjitetit njerëzor! Ky ligj e ky vlerësim i koeficientit nuk është as për së afërmi ajo çka kanë pritur dhe çka meritojnë qytetarët tanë. Qeveria duhet menjëherë ta tërheq këtë vlerësim të gabuar dhe ta bëjë rivlerësimin meritor, përndryshe do të jetë vetë Qeveria përgjegjëse për të gjitha pasojat që do të prodhojë ky ligj e ky vlerësim!”, ka vlerësuar LB-ja.
