Kurti njofton ambasadorët e huaj për gjashtë pikat e tij për “marrëveshjen e vitit 2013”
Zyra e Kryeministri ka bërë të ditur se temë qendrore e takimit të kryeministrit, Albin Kurti me ambasadorët dhe diplomatët e akredituar të misioneve diplomatike në Kosovë, ishte proceci i dialogut, propozimi evropian dhe rruga përpara.
Kështu ka njoftuar ZKM përmes një njoftimi për media, ku ndër të tjera thuhet se Kurti i ka njoftuar ata edhe për planin gjashtë pikësh për Asociacionin.
“Ai po ashtu shprehu gatishmërinë e tij për takime të radhës në Bruksel të nivelit të lartë politik dhe intensifikim të procesit të dialogut për normalizim të plotë të marrëdhënieve ndërmjet Kosovës dhe Serbisë me njohjen reciproke në qendër.” – thuhet në njoftim.
Njoftimi i plotë:
Kryeministri i Republikës së Kosovës, Albin Kurti, i shoqëruar nga zëvendëskryeministri i parë për Integrim Evropian, Zhvillim dhe Dialog, Besnik Bislimi ka pritur sot në ndërtesën e Qeverisë ambasadorët dhe diplomatët e akredituar të misioneve diplomatike në Kosovë.
Temë qendrore e diskutimit ishte procesi i dialogut, propozimi evropian dhe rruga përpara.
Kryeministri Kurti i njoftoi ata me qëndrimet e Qeverisë së Republikës së Kosovës përfshirë këtu edhe gjashtë pikat e prezantuara në Seancën e Kuvendit javën e kaluar në lidhje me marrëveshjen e Brukselit të vitit 2013.
Ndër të tjerash, ai tha se Kosova ka dëshmuar përkushtimin e saj për dialog përmes qasjes konstruktive dhe propozimeve kreative.
Ai po ashtu shprehu gatishmërinë e tij për takime të radhës në Bruksel të nivelit të lartë politik dhe intensifikim të procesit të dialogut për normalizim të plotë të marrëdhënieve ndërmjet Kosovës dhe Serbisë me njohjen reciproke në qendër.
