Kompania “Pastrimi” njofton se i është rikthyer punës
Greva e punëtorëve të kompanisë “Pastrimi”, që la Prishtinën sot të mbuluar nga mbeturinat duket se ka përfunduar.
Kompania përmes një njoftimi në Facebook, ka njoftuar se ekipet e saj kanë dalë në terren për të vazhduar punën për grumbullimin dhe largimin e mbeturinave,
Kujtojmë se punëtorët e kësaj kompanie që punonin me rrogë 330 në muaj, kishin kërkuar rritje page prej 70 eurosh, ndërsa ishin shprehur të bindur se nuk do t’i rikthehen punës nëse kërkesa e tyre nuk do të plotësohej.
Megjithatë, në njoftimin e fundit kompania tregon se puna do të rinisë, pa dhënë detaje nëse është arritur ndonjë marrëveshje me punëtorët ose jo.
Njoftimi i plotë
Kompania Regjionale e Mbeturinave “Pastrimi”, Sh.A-Prishtinë, njofton opinionin publik se ekipet kanë dal në teren për të vazhduar me grumbullimin dhe largimin e mbeturinave.
Po ashtu njoftojmë qe kryerja e shërbimit të mbeturinave do të vazhdojë sipas planit dhe orarit të rregullt opetativ.
Falenderojmë secilin qytetar për mirëkuptimin që kanë treguar ndaj punëtorëve te kompanisë sonë.
Me respekt,
Kompania Regjionale e Mbeturinave KRM “Pastrimi”, Sh.A-Prishtinë
