Këto janë vendimet që i mori Qeveria në mbledhjen që e mbajti mbrëmë
Mbrëmë kabineti qeveritar, mbajti mbledhje elektronike. Kjo është mbledhja e 128 e Qeverisë e në to u morën disa vendime.
Qeveria miratoi vendimin për themelimin e Komisionit për Shtesën e Kushteve Specifike të Punës.
Është marrë edhe vendimi për ndarjen e 10 milionë e 300 mijë eurove për zbatimin e masave të Pakos së Ringjalljes Ekonomike.
Njoftimi i plotë i ZKM’së:
Qeveria e Kosovës ka zhvilluar mbledhjen e 128-të, kësaj radhe në formë elektronike, në të cilën ka miratuar:
– Vendimin me të cilin Qeveria e Republikës së Kosovës jep mendim lidhur me Nismën legjislative për Projektligjin për ndryshimin dhe plotësimin e Ligjit Nr. 03/L-163 për Minierat dhe Mineralet i ndryshuar dhe plotësuar me Ligjin Nr. 04/L-158. Qeveria vlerëson nismën në pajtim me Kushtetutën e Kosovës dhe Ministria e Ekonomisë mbështetë nismën e propozuar dhe Ministria e Financave, Punës dhe Transfereve ka vlerësuar se kjo nismë nuk krijon kosto shtesë buxhetore për Buxhetin e Republikës së Kosovës.
– Vendimin për themelimin e Komisionit për Shtesën e Kushteve Specifike të Punës.
– Vendimin për ndryshimin dhe plotësimin e Vendimit të Qeverisë Nr. 29/112 të datës 13 dhjetor 2022 për miratimin e Planit të Veprimit për Zbutjen e Ndikimit të Menjëhershëm Socio-Ekonomik të Krizës Energjetike.
– Vendimin për miratimin e ekuivalencës së sistemit të vjetër me sistemin e ri të klasifikimit të koeficienteve me qëllim të llogaritjes së pagës bazë për të punësuarit në sektorin publik, sipas Ligjit Nr. 08/L-196 për Pagat në Sektorin Publik për të cilët është i nevojshëm procesi i klasifikimit të vendeve të punës.
– Vendimin për ndarjen e 10,300,000.00 euro për zbatimin e masave të Pakos së Ringjalljes Ekonomike.
