Kërkesa për rritje të çmimit të energjisë për rreth 30%, Shala: Qeveria duhet të ndërhyjë
Kandidati i PDK-së për deputet, Ferat Shala, ka komentuar kërkesën e kompanive energjetike për rritjen të çmimit te energjisë elektrike.
Ai ka kërkuar nga ZRrE që të jetë e kujdesshme në trajtimin e kërkesës se tri kompanive energjetike.
Në profilin e tij në “Facebook”, Shala ka treguar se për të parandaluar këtë rritje duhet të ndërmerren disa hapa.
Sipas tij, në këtë situatë duhet të ndërhyjë Qeveria.
Statusi i plotë i Shalës:
Rritja e çmimit të energjisë!
Kërkesa për rritjen e çmimit të energjisë është pasojë e një planifikimi jo të duhur dhe një qasjeje joprofesionale ndaj kostove reale të operimit.
Nënvlerësimi i kostove në vitin e kaluar dhe shtyrja e tyre për t'u trajtuar më vonë ka krijuar një barrë financiare që tani duhet të paguhet nga konsumatorët fundor. Kjo praktikë nuk është e drejtë dhe tregon për një menaxhim të dobët dhe të ndikuar, ku vendimet merren më shumë për arsye politike sesa në interes të konsumatorëve.
Sipas kërkesave të paraqitura nga kompanitë e energjisë, rritja e çmimeve mund të jetë e konsiderueshme. Kjo për faktin se KESCO dhe KEDS kanë kërkuar që të hyrat e lejuara për vitin 2025 të rriten dukshëm (rreth 100 milion), si pasoj e tejkalimeve në vitin e kaluar. Nga informatat publike, operatoret (KOSTT,KEDS dhe KESCO) kanë këkruar rritje rreth 30%, dhe kjo rritje është e papërballueshme për konsumatorin.
ZRRE, duhet të jetë e kujdesshme duke treguar transparenc dhe profesionalizëm në vlerësimin e aplikimeve tarifore nga operatorët. Sidoqoft cdo rritje e energjisë elektrike paraqet ngarkesë për konsumatorët dhe papergjegjësi nga ana e qeverisë së Kosovës.
Fatkeqësisht, jemi para një realiteti ku nga Prilli i këtij viti faturat e konsumatorëve do të pësojnë rritje të theksuar, e cila do të legjitimohet përmes vendimit nga bordi i ZRRE-së.
Rritja e çmimeve të energjisë nuk duhet të jetë një zgjidhje e parë, por një masë e fundit pas shterimit të të gjitha mundësive për menaxhim më efikas dhe mbështetje shtetërore. Për ta parandaluar këtë rritje, nevojiten disa hapa të domosdoshëm, si, transparencë më e madhe, ku Institucionet përgjegjëse dhe kompanitë energjetike duhet të jenë më të hapura me publikun për mënyrën se si llogariten tarifat. Publiku duhet të ketë qasje në të dhëna të detajuara mbi kostot e furnizimit, importit dhe operimit të sistemit energjetik.
Kosova ka humbur shumë në mirëqenien e qytatarëve dhe zhvillimin ekonomik gjatë këtyre 4 viteve. Refuzimi i projekteve për ndërtimin e kapaciteteve të reja energjetike ka ndikuar direkt në varëshmërin e sektorit nga Importi i energjisë elektrike, dhe si pasoj tani konsumatorët i bartin pasojat në faturat e tyre.
Prandaj, rritjen e kapaciteteve të brendshme të prodhimit të energjisë nga burime të qëndrueshme, duke shfrytëzuar burimet alternative si era dhe dielli, janë zgjidhje e domosdoshme.
Në keto rrethana, Qeveria duhet të ndërhyjë për të shmangur një barrë të menjëhershme mbi qytetarët. Ndikimet politike nga vitet e kaluara kanë sjellë sektorin energjetik në një situatë të vështirë, prandaj, kërkohet një qasje shtetërore më strategjike për të siguruar një sistem energjetik që është i qëndrueshëm dhe i përballueshëm për konsumatorët.
