“Ka frikë”, “Po i mbron dosllarët e krimit”: Opozita e skandalizuar me videon e Kurtit për ministren Hajdari
Mbrojtja që Kryeministri Albin Kurti ia ka bërë mbrëmë Ministres së Industrisë, Ndërmarrësisë dhe Tregtisë, Rozeta Hajdari, pas skandaleve në këtë ministri, ka skandalizuar opozitën.
Përfaqësuesit e partive opozitare kanë bërë me dije se mesazhi i Albin Kurti i dhënë përmes një video në profilin e tij në “Facebook” tregon për friken që Kurti ka për aferën e furnizimit me vaj dhe miell për rezerva shtetërore.
Sipas tyre, sulmi që kryeministri në këtë video ua ka bërë mediave dhe gjyqësorit është i paprecedent.
Lideri i AAK-së, Ramush Haradinaj, ka theksuar se Kurti po mbron dostat e krimit.
Në profilin e tij në “Facebook”, Haradinaj ka shkruar se Kurti po i sulmon mediat vetëm pse po ia zbulojnë hajnin.
“Ç'është ky kryeministër që e lufton sistemin e drejtësisë të shtetit të vet e i mbron "dosllarët" e krimit! Ç'është ky njeri që e sulmon median e shtetit ku vet është kryeministër, veç pse ato i'a zbulojnë hajnitë e miqtë matrapazë! Ky njeri që vjedhjen e bukës së popullit, mundohet ta mbulojë me "borën e parvjeme"! Çka duhet të ndodhë tjetër që ju që keni votë, që keni zë, që keni mendje e zemër dhe që e doni Kosovën, të bindeni se shkarkimi i këtij njeriu, sot është detyrë kombëtare!”, ka shkruar Kurti.
Edhe sekretari i PDK-së, Betim Gjoshi, ka vlerësuar se video e shefit të ekzekutivit është dëshmi se ai po e mbron krimin.
“Jam i skandalizuar nga videoja e Albin Kurti. Kjo video është dëshmi se ai është mbrojtës i krimit dhe duke qenë i tillë, Kryeministri po e pengon drejtësinë. Albin Kurti po e mbron Rozeta Hajdarin e Ridvan Dallavergjiun sepse edhe ai është i përfshirë dhe bashkëpërgjegjës në këto vepra të pastra korruptive dhe kundër sigurisë kombëtare”, ka shkruar ai, duke shtuar se kjo nuk është hera e parë që ai e bën një gjë të tillë.
“Bashkëpunëtori i superkriminelit, Milan Radojçiqit, ashtu siç e mbronte Mimoza Kusarin që ia koordinonte punët, njejtë po e mbron Rozeta Hajdarin dhe Ridvan Dallavergjiun. Albin Kurti me të njejtën fuqi e mbron edhe Nagip Krasniqin dhe Martin Berishajn”, ka vlerësuar Gjoshi.
Kurse, zyrtari i LDK-së, Berat Rukiqi, ka thënë se në adresimin e tij Kurti ka reflektuar frikë dhe pasiguri.
“Kurti në adresimin e sontëm nuk reflektoi siguri për atë çka po e thotë, por reflektoi nervozë e frikë dhe sigurisht ka një arsye të caktuar për këtë dhe ne besojmë që vetë afërsia e kryeministrit dhe njerëzve rreth tij me personazhin kryesor të kësaj afere, pronarin e kompanisë “Bukë e Zemër” që ka porositur rezervat shtetërore, në këtë rast Rivdani, i ka jep mjaftueshëm arsye kryeministrit që të shfaqë këtë nervozë dhe të del në mënyrë të paprecedentë ta mbrojë një rast i cili është krejt në fillim të hetimeve”, është shprehur Rukiqi në “Edicioni Special” në Klan Kosova.
Çka tha Kurti?
Në orët e mbrëmjes, kryeministri Albin Kurti u është drejtuar qytetarëve për arrestimet në MINT. Ai ka mbrojtur ministren Rozeta Hajdari, duke thënë se i beson asaj dhe se nuk ka keqpërdorim për rezervat shtetërore.
“97% të vlerës së blerë vitin e kaluar ka mbërrirë në Kosovë, përfshirë këtu 99,5% të sasisë së grurit që tashmë ndodhet në depo në vendin tonë, e për pjesën e mbetur, kompanitë furnizuese kanë obligim të hapur për ta përmbushur kontratën, dhe nëse nuk e bëjnë këtë janë procedurat ligjore. Nuk ka kurrfarë korrupsioni e keqpërdorimi. Unë kam besim të plotë në Ministren Rozeta Hajdari dhe në punën e saj. Pas luftës në Ukrainë, kur kishte krizë globale, ministria që ajo drejton, i ka blerë rezervat dhe i ka mbushur depot në një kohë kur të gjithë kufijtë ishin mbyllur e pothuajse të gjitha shtetet kishin ndaluar eksportin”, ka thënë ai.
Pasi ka mbrojtur, ministren Hajdari ai i është sulur qeverive të kaluara.
“Humbësit i gjeni tek elita e vjetër dhe e korruptuar politike, te gjykatës dhe prokurorë të saj, te mediat e keqpërdoruara pёr mbёshtetje tё krimit. Edhe pse tё paktё nё numёr, pёrfitimet e tyre kanё qenё shumëmilionёshe, andaj edhe nuk kanё se si mos tё ndihen humbës tё mëdhenj. Përpjekjet e tyre për ta ndryshuar situatën janë në shërbim të planit për ta kthyer ish sistemin e kalbur e tё korruptuar”, ka thënë ai, duke shtua se ata po përpiqen t`i ruajtur pasurit e akumuluar me hajni e korrupsion.
“Por, do tё dёshtojnё si nё aspiratën e tyre pёr kthim tё keqpёrdorimit, ashtu edhe nё synimin pёr përbaltjen e atyre qё kontribuojnë pёr moskthim tё asaj periudhe. Do tё dёshtojnё edhe nё frikёsimin e secilit qё i bashkohet karvanit tё reformave progresiste dhe zhvillimit gjithëpërfshirës. Piskamat, shpifjet dhe aksionet pompoze tё tyre do dëgjohen gjithnjё e mё rrallё”, ka thënë Kurti.
Shefi i ekzekutivit nuk ka kursyer as sistemin e drejtësisë.
“Me qindra raportime zyrtare e kallëzime penale i kanë deponuar ministritë tona për krimin e korrupsionin që e kemi gjetur, por, përgjithësisht, kjo nuk i ka bërë përshtypje prokurorisë së shtetit. Reformat tona nuk do arrijnë t’i ndalin. Rastet e akumuluara tё krimit e tё deponuara nga kjo qeveri nuk do mund t'i fshehin edhe shumё gjatё”, është shprehur Kurti.
Nën dyshimin se kanë bërë keqpërdorime gjatë blerjeve të rezervave shtetërore, policia e Kosovës dje ka arrestuarit dy zyrtarë të Ministrisë së Industrisë, Ndërmarrësisë dhe Tregtisë, dhe biznesmenin Ridvan Muharremi, i cili është një mik i ngushtë i kryeministrit Albin Kurti.
Zyrtarët e arrestuar të MINT-it janë drejtori Divizionit për Rezervat Shtetërore të Mallrave, Hafiz Gara, dhe drejtori i Departamentit për Integrim Evropian dhe Koordinim të Politikave, Irfan Lipovica.
Të arrestuarit janë dërguar në mbajtjes për 48 orë.
