Hindusët në Indi luten për fitoren e Harrisit

Zgjedhjet në ShBA përcillen nga mbarë bota. Disa besimtarë hindusë në jug të Indisë të hënën u lutën për fitoren e kandidates demokrate për president, Kamala Harris.

Harrisi është bijë e imigrantëve nga India e Xhamajka. Nëna e saj është e lindur në shtetin indian, Tamil Nadu, para se të vendosej në ShBA për një program doktorate, raporton televizioni CNN.

Harrisi i ka ndarë kujtimet e fëmijërisë, kur e kishte vizituar gjyshin në Chennai dhe ka folur se si trashëgimia e saj indiane ka ndikuar në jetën dhe karrierën e saj.

“Udhëheqësja jonë indiane dhe Tamil, Kamala Harris, do të marrë pjesë në zgjedhjet presidenciale. Përfundimisht, ajo do t’i fitojë zgjedhjet” – tha Ballu, themelues i një organizate në qytetin Madurai në Tamil Nadu.

Në video, pankarta me fytyrën e Harrisit shfaqen pranë idolëve hindus, ndërsa njerëzit thonin lutje dhe lëshonin petale lulesh tek idolët.

Shumë amerikano-indianë u bënë më energjikë, pasi zonja Harris u bë e nominuar e Partisë Demokratike për presidente.