“Hetim; protestë”: Vlojnë reagimet për përgjimin nr.3 të Mimoza Kusari-Lilës
Gazeta Nacionale ka botuar sot vazhdimin e tretë të audio-incizimeve të Mimoza Kusari-Lilës, shefe e grupit parlamentar të VV-së dhe Slavko Simiq, ish-deputet i Listës Serbe, ku, mes të tjerash, Kusari e akuzon Ramush Haradinajn, kryetar i AAK-së, për fryerje të listave të veteranëve të UÇK-së dhe e ofendon rëndë Uran Ismailin e PDK-së, duke e quajtur idiot patetik. Këto përgjime, sërish kanë ngjallur shumë reagime nga partitë opozitarë, analistët e gazetarët kosovarë.
Në fakt, ndër të parët që reagoi ishte Bekim Haxhiu, që u apostrofua nga Kusari-Lila në mënyrë pezhorative gjatë bisedës me Simiqin. Haxhiu përmes një postimi në Facebook, ka shkruar “Albin dhe Mimozë: A e dini bre kush jeni ju? Ju jeni llumi i shoqërisë kudo që folët shqip?!”
Tutje, Haxhiu shkroi se VV-ja shkojnë të Radojçiqi pa hezitim këta tradhtarë, kolaboracionista, mashtrues, rrenca, hajna, shpiuna.
“LVV Krejt dhe Drejt te Radojçiqi! Te ai shkojnë pa hezitim këta tradhtarë, kolaboracionista, mashtrues, rrenca, hajna, shpiuna...!!!” – ka shkruar Haxhiu.
Ndërsa Daut Haradinaj, ish-deputet i AAK-së, i reagoi Kusari-Lilës pasi ajo e akuzoi Ramush Haradinajn, kryetar i AAK-së, për fryerjen e listave të veteranëve të UÇK-së. Haradinaj ka shkruar shkurt se “Turpi ka emër!”.
Në audio-incizimet e publikuara nga Nacionale, Kusari-Lila e përmend edhe protestën e veteranëve të UÇK-së. Në lidhje me këtë, ka reaguar Faton Klinaku, sekretar i OVL-së së UÇK-së. Klinaku shkroi që tash po dëshmohet për një bashkëpunim në mes pushtetit dhe Listës Serbe, që sipas Klinakut është e pamoralshme dhe e pakuptueshme. Madje, ai kërkoi edhe hetim ndaj Kusarit e Simiqit.
“Pas përgjimeve, së paku prokuroria duhet që t'i intervistojë deputetët Mimoza Kusari-Lila dhe Slavko Simic, se pse mbajnë kontakte me një të ndjekur nga shteti i Kosovës siç është Milan Radoiçiq, e qe besa t'iu ngris aktakuzë për këtë, pasiqë edhe mund ta dijnë vendndodhjen e tij.” – shkroi ai.
Fatmir Humolli, deputet i revoltuar i VV-së, shkroi se s’kanë qenë në dijeni për koordinim të VV me Listën Serbe, teksa ka shtuar se në rastin e Veteranëve, Lista Serbe ka votuar në mënyrë unike sikurse Vetëvendosje.
“S’kam qenë në dijeni, dhe besoj që s’ka pas dijeni ndonjë prej deputetëve. Me përjashtim që është pa se Lista Serbe në mënyrë unike ka votuar sikur Vetëvendosje kundër veteranëve të luftës. Kanë hy në sallë, si është kry votimi Lista Serbe kanë dalë jashtë”, ka thënë Humolli.
Tutje, ai ka thënë se veprimet e Kusari-Lilës, kanë dëmtuar interesin kombëtar të Kosovës.
“Parapërgatitjet apo përgatitjet nuk çojnë peshë shumë, sesa veprimi, veprim që ka qenë i dëmshëm për çështjen e Kosovës, i dëmshëm politik, edhe moral, por i dëmshëm edhe në aspektin social. Në të gjitha drejtimet e ka dëmtuar interesin kombëtar”, ka shtuar tutje.
Ndërsa analist Vehbi Kajtazi përmendi edhe nevojën e protestës, ose më saktë të “mbushjes së shesheve të Prishtinës” me luftëtarë të UÇK-së, pas deklaratave të Kusarit në lidhje me veterantët e UÇK-së.
“Nese sheshet e Prishtines nuk mbushen me luftetare te UÇK-se, atehere e bajshin me shnet perçmimin e Mimoza Kusarit.” – shkroi z. Kajtazi, ndërsa më vonë shkroi edhe termin protestë.
Deputetja e LDK-së, Rrezarta Krasniqi, përmes një postimi në Facebook, shkroi se ka thënë se përgjigjet e zbuluan të vërtetën e VV-së dhe se çfarë ata mendojnë për vendin dhe për ata që kontribuan në çlirimin e vendit.
