Haxhiu: Duke i kërkuar kompromise po i hyhet në hak Kosovës
Ministrja e Drejtësisë, Albulena Haxhiu, ka bërë me dije se ata që po i kërkojnë kompromise Kosovës në dialog me Serbinë po i hyjnë në hak Republikës së Kosovës.
Duke përkujtuar vrasjen e shqiptarëve të Mitrovicës më 3 dhe 4 shkurtit të vitit 2000, ajo ka thënë se Kosova ka dhënë mjaft deri me tani.
Në profilin e saj në “Facebook”, Haxhiu ka shkruar se liria dhe shteti i Kosovës nuk janë dhuratë, sepse ato janë arritur me gjak e sakrificë.
“Kur të gjithë besonin se çlirimi i Kosovës ishte kryer në qershorin e vitit 1999, në prani edhe të forcave e misionit ndërkombëtar, tetë muaj më pas, në veri të Mitrovicës popullsia shqiptare po përjetonte një tmerr tjetër. Ishte kjo nata e tmerrit e 3 dhe 4 shkurtit të vitit 2000, ku 10 shqiptarë u ekzekutuan, 1564 familje u dëbuan nga shtëpitë e tyre dhe 11 364 persona të tmerruar, dhunshëm u detyruan të largohen për të gjetur strehim për sigurinë e jetës së tyre. Serbia ka shkaktuar shumë krime e dëme në Kosovë. Populli i Kosovës e ka përjetuar në lëkurën e tij këtë gjë. Ata që kërkojnë gjithnjë e më shumë kompromise ku vetëm Kosova duhet të dhënë diçka janë duke i hyrë në hak Kosovës. Liria dhe shteti i Kosovës nuk janë dhuratë, ato janë arritur me gjak e sakrificë. Lavdi e drejtësi për martirët e natës së tmerrit të 3 dhe 4 shkurtit”, ka shkruar Haxhiu.
