Hakmarrja brutale e pushtetit veç brenda një dite
Tri hakmarrje brutale të pushtetit të Vetëvendosjes, të gjitha me vende pune janë raportuar këtë të enjte. Dy zyrtarë policorë që po hetonin afera korruptive u degraduan, bash një ditë para se Ministrja Rozeta Hajdari të paraqitej para Prokurorisë, si shkak hetimi i tyre, e një tjetër qytetar u largua krejt nga puna, kjo mu në ditën që kishte dorëzuar kallëzim penal ndaj Fitore Pacollit.
Hakmarrja me protestuesin e Pacollit
Agim Pllashniku, personi i cili protestoi kundër Fitore Pacollit, për grandet që kishin përfituar familjarët e saj, e përçka tha se u shty nga asistenti i saj, çka bëri atë ta padisë Pacollin, sot ka marrë lajmin e hidhur se i është shkëputur kontrata e punës.
Pllashniku që punonte në Ibër-Lepenc, i cili udhëhiqet nga njeriu i Vetëvendosjes, Faruk Mujka, nga sot nuk është pjesë e kësaj ndërmarrje. Mujka, që vet ishte arrestuar e i ishin sekuestruar një shumë e majme të hollash, nënshkroi vendimin për t’ia ndërprerë marrëdhënien e punës Pllashnikut.
Avokati i Pllashnikut tha se “nuk ka bazë ligjore”, dhe se “s’kishte as një vërejtje të mëparshme”, përçka e cilësoi vendimin si hakmarrje, sipas tij, sikurse në Korenë e Veriut.
Hetuesit
Nacionale sot publikoi hulumtimin për degradimin e dy hetuesve nga Policia e Kosovës.
Ata u larguan nga Njësia e Veçantë që e lufton korrupsionin dhe njëri u dërgua në Skënderaj, tjetri në Malishevë.
Pra, nga hetues të milionave, në mbikëqyrës të patrullave.
Këtë vendim, ata e kishin pranura ditën e djeshme. Saktësisht, një ditë para se për rastin e rezervës të intervistohej Rozeta Hajdari.
Të dy hetuesit e degraduar, kishin qenë në krye të hetimeve për këtë rast që nga dita e parë.
Doarsa Kica-Xhelili e Lidhjes Demokratike të Kosovës këtë e përkthen në terma të thjesht pushteti dhe ndëshkimi: “E heton VV-në – të pret hakmarrja”. Dhe degradimi i njërit, për nga tajmingu, përsosmërisht para se të thirrej Rozeta Hajdari nga Prokuroria Speciale: ku ka vendosur brenda të mbrohet në heshtje, por që jashtë të sulmojë organet e ndjekjes me zë.
“Kur policët ndëshkohen pse hetojnë qeverinë demokracia nuk është më funksionale. Është fasadë. Në Hungari, hetuesit e papërshtatshëm zëvendësohen. Në Rusi, largohen. Në Venezuelë, shtypen. Kudo, mesazhi është një: Preke pushtetin – dhe pushteti t’a ‘tregon vendin’”, shkroi Kica-Xhelili.
Deputetja e Partisë Demokratke të Kosovës, Blerta Deliu-Kodra, reagoi poashtu duke thënë se qeveria (tash në detyrë) e Vetëvendosjes lufton ata që luftojnë korrupsionin.
“Në rast se këto raportime qëndrojnë, ky është sinjal i qartë, se kush guxon të prekë të pushtetshmit, ndëshkohet. Sepse, në vend që të mbrohen hetuesit, pushteti po i largon nga rastet e mëdha, duke penguar hetimet dhe duke e kthyer drejtësinë në farsë. Nuk mund të ketë luftë kundër korrupsionit pa mbrojtur ata që e luftojnë korrupsionin”, shkroi ajo.
Gazetari Lirim Mehmetaj pas raportimit të Nacionales e quajti “pushtet të frikshëm” mënyrën e degradimit të dy policëve me vendim të drejtorit të Policisë së Kosovës, Gazmend Hoxhës, i cili, tashmë në strukturat udhëheqëse e sheh “të dirigjuar politikisht nga Xhelal Svçela2.
“Hetuesin policor, Shaip Elshani, që po e hetonte Hajdarin, policia e ka transferuar në Malishevë. Kurse Idriz Gashin në Skenderaj. A po e kuptoni që kjo është ndërhyrje e padëgjuar më parë në Kosovë, ku hetuesit tërhiqen pothuajse në fund të rastit”, tha ai.
“Për ata që nuk e dijnë, hetuesi policor është personi kryesor në rast, sepse ai është i ngarkuar me gjetjen e fakteve dhe prezantimin e tyre para prokurorit. Shtet mafi. Pushtet i frikshëm”, përfundoi Mehmetaj.
