Gjithçka e rrënuar e njerëz të tronditur: Pamje të tmerrshme nga Turqia pas tërmetit

Më shumë se 600 persona kanë vdekur në Turqi e Siri si pasojë e një tërmeti të tmerrshëm që ka goditur dy vendet.

Sipas raportimeve tërmeti ka qenë rreth 7.8 ballësh, transmeton Nacionale.

Tashmë media të ndryshme ndërkombëtare e qytetarë po publikojnë nëpër rrjete sociale, gjendjen momentale pas tërmetit.

Ndërtesa të rrënuara, qytetarë të lënduar dhe familjarë që po kërkojnë të afërmit e tyre nën rrënoja. Kjo është ajo që shihet nga pamjet e publikuara nëpër rrjete sociale.

Qindra njerëz besohet se kanë mbetur ende të ngujuar nën rrënojat e ndërtesave.

Raportohet se 284 njerëz janë vrarë në shtatë provinca të Turqisë, ndërsa 440 të tjerë janë lënduar.

Në Siri, numri i të vdekurve raportohet të ketë arritur në 237.

Turqia është njëra prej zonave më aktive të tërmetit në botë, për shkak të pozitës gjeografike.

Shumica e Turqisë ndodhet në pllakën tektonike të Anadollit, e cila ndodhet mes pllakave të mëdha – euroaziatike dhe afrikane – si dhe mes një të vogle, arabike. Derisa dy pllakat e mëdha lëvizin, Turqia shtrydhet, thonë ekspertët.