“Djemtë e Thaçit e Veselit, çika e Krasniqit”: Si reaguan familjarët e ish-krerëve të UÇK-së rreth gjykimit në Hagë?
Në Hagë ka filluar më në fund procesi gjyqësor ndaj Hashim Thaçit, Kadri Veselit, Rexhep Selimit e Jakup Krasniqit, ish-krerët e Ushtrisë Çlirimtare të Kosovës, të cilët po përballen me akuza për krime lufte e krime kundër njerëzimit. Pas nisjes, ku Prokuroria e Specializuar dëshmoi argumentet e saj, kanë reaguar edhe familjarët e ish-krerëve të UÇK-së.
Ata zgjodhën rrjetet sociale për të shprehur emocionet e qëndrimet e tyre. Endrit Thaçi, djali i ish-presidentit Thaçi, Klestor Veseli, djali i ish-kryekuvendarit Veseli, e Gresa Krasniqi, çika e Jakup Krasniqit, shkruan ca fjalë në profilet e tyre në rrjetet sociale.
I pari që reagoi ishte Endriti, djali i Hashim Thaçi. Që në mëngjes, z. Thaçi shkroi se sot fillon një betejë e radhës për të vërtetën, duke e shpërndarë edhe një fotografi të tij nga “Marshi për Drejtësi”, që u organizua në Prishtinë me 2 prill.
“Sot fillon gjyqi. Fillon edhe beteja e radhës për të vërtetën. Me zemrën plot siç ishin edhe sheshet dje plot, e vërteta e luftës dhe lirisë do të fiton. Faleminderit nga zemra për mbështetjen tuaj.” – shkroi Thaçi i ri në Instagram, transmeton Nacionale.
Të njëjtin rrjet social e zgjodhi edhe i biri i Kadri Veselit, Klestori, për të treguar qëndrimet e emocionet e tij në ditën kur filloi gjyqi ndaj babait të tij. Ai shkroi se i falënderon të gjithë për solidarizimin me ish-krerët e UÇK-së.
“Faleminderit të gjithë shqiptarëve që masivisht u solidarizuan me prindërit tanë - si dje në Prishtinë, ashtu dhe sot në Hagë! Malli për babain lehtësohet nga krenaria për të kur e shohim një përkrahje kaq të madhe. Krenar me UÇK-në. Faleminderit të gjithëve! Zoti qoftë me ju!” - shkroi Klestor Kadri Veseli, tranemton Nacionale.
Ndërsa e bija e Jakup Krasniqit, Gresa Krasniqi, e postoi një fotografi të babait të saj, duke ia komentuar “buzëqeshjen dhe kravaten me shqiponja”. Ajo e uroi babain e saj dhe krerët e tjerë të UÇK-së që të dalin faqebardhë.
“Të adhuroj buzëqeshjen dhe kravaten me shqiponja që me aq krenari i mban gjithmonë. Jetofsh gjatë, dashnia ime. Dalshi faqebardhë Çlirimtarë e bashkë me ju faqebardhë dalt dhe lufta e lavdishme e UÇK-së” – shkroi Gresa Krasniqi, e bija e ish-zëdhënësit të UÇK-së, Jakup Krasniqit.
Çka ndodhi sot në Hagë?
Pas një pritje për më shumë se 2 vjet e gjysmë, ka nisur edhe zyrtarisht gjykimi ndaj Hashim Thaçit, Kadri Veselit, Rexhep Selimit e Jakup Krasniqit. Në Hagë u mbajt seanca e parë hapëse ku Prokuroria pati 5 orë kohë për ta thënë fjalën e saj. Përderisa jashtë objektit mijëra protestues ishin mbledhur nga diaspora, duke kërkuar drejtësi për krerët e UÇK-së.
Ashtu siç u deklaruan qysh kur u arrestuan, ashtu u deklaruan edhe 2 vjet e gjysmë pas. Katër ish-liderët e Ushtrisë Çlirimtare të Kosovës e përsëritën se janë të pafajshëm në të gjitha pikat e akuzës. Disa patën vërejtjet për vonesat në nisjen e gjykimit.
Alex Whiting, ushtrues detyre i Prokurorit të Specializuar, qysh në nisje të fjalimit të tij bëri të ditur akuzat kryesore ndaj krerëve të UÇK-së. Ai përmendi qindra arrestimet të personave që etiketoheshin si tradhtarë dhe vrasjen e rreth 100 personave. Whiting tha se ka pasur një plan e strategji për t’u marrë me këta persona. Sigurisht, në këtë ditë të parë kishte edhe deklarata të çuditshme.
Njëri nga prokurorët që mori fjalën në seancë ishte Matt Hawling. Ai bëri një deklarim që u kritikua mjaft shumë në rrjete sociale. Tha se UÇK-ja i kishte sulmuar me granata 12 stacione të Policisë. E sipas tij, kjo bëri që Serbia ta kryejë masakrën në Likoshan e Qirez.
“Në vitin 1997 UÇK-ja arriti në një pikë ku mund të kryente sulme të orkestruara ndaj Ushtrisë serbe në të njëjtën kohë. Provat treguan se në 1997. Në vitin 1997 UÇK sulmoi 12 stacione të policisë me granatahedhës. Provat tregojnë se sulmi u organizua nga Rexhep Selimi teksa u ndihmuan nga Thaçi dhe Veseli për të siguruar armët”, deklaroi ky prokuror.
Tutje, ai i lidhi në një mënyrë të pakuptimtë vrasjet, masakrat e krimet serbe me përpjekjet e UÇK-së për liri.
“Pas sulmeve të UÇK-së, forcat serbe nisën një aksion në Likoshan e Qirez që çuan në humbje të jetës së civilëve. Forcat serbe në 1998 sulmuan Adem Jasharin duke e vrarë atë dhe gjithë familjen. Kjo ngjarje kishte efekt nxitës në Kosovë, me shumë vullnetarë. Luftimet u përshkallëzuan në mars 1998. Zhvillimet e marsit 1998 i kërkuan stafit të përgjithshëm të ndante përgjegjësi e të konsolidonte radhët e veta. Fatmir Limaj shkoi në Kleçkë, Shukri Buja që u udhëzua nga Thaçi të shkojë në Lipjan”, theksoi më tutje prokurori Hawling.
