Byroja e pajetësuar merr rol të ri te Gërvalla: nga "mbledhëse informatash" në “konfiskuese” pasurie
Donika Gërvalla, aktualisht ministre në detyrë e Drejtësisë në qeverinë Kurti, doli së fundi me një video-adresim në Facebook për ta ricikluar zotimin që pushteti e bart si shtyllë programore që nga viti 2021, të cilën refuzon ta jetësojë: Byroja Shtetërore për Verifikimin dhe Konfiskimin e Pasurisë së Pajustifikueshme do të bëhet patjetër, sipas saj.
Pas gjysmë dekade premtimesh të bujshme, çështja e Byrosë është shndërruar nga pushteti në instrument të luftës së përditshme politike, ku suksesi i saj matet kryesisht me pikët elektorale të fituara përmes akuzave ndaj “sabotuesve” të pretenduar të kësaj reforme.
Përmes një video-adresimi të fundit, Gërvalla iu drejtua opinionit ku tha mes tjerash se “Buroja Shtetërore për Verifikim të Pasurisë së Pajustifikueshme do të themelohet. Pasuria e pajustifikueshme, e grumbulluar padrejtësisht mbi kurrizin, mundin dhe djersën e qytetarëve nuk mund të mbetet kurrsesi e paprekshme. Ajo duhet të verifikohet, të konfiskohet kur nuk justifikohet”.
Këtë herë, ndonëse vetëm dy muaj më parë insistonte se roli i këtij institucioni do të kufizohej në mbledhjen e informatave të besueshme, Gërvalla e paraqiti Byronë si një organ ekzekutues, i cili e kryen vetë si procesin e verifikimit, ashtu edhe konfiskimin real të pasurisë.
Megjithatë, ky qëndrim i ri bie ndesh me mbrojtjen që vetë ajo i bëri këtij projektligji para Komisionit Parlamentar për Legjislacion gjatë prillit të vitit 2026.
E ballafaquar me vërejtjet e ashpra të opozitës se legjislacioni i jep “kompetenca tejet të mëdha drejtorit”, Gërvalla pati këmbëngulur në një rol krejtësisht pasiv dhe thjesht teknik të këtij organizmi. Ajo kishte deklaruar se:
“Byroja asesi nuk konfiskon. Ajo ekskluzivisht mbledh, verifikon dhe analizon informacionin e duhur”, dhe se “vendimi përfundimtar për konfiskim merret nga gjykata”.
Sipas shpjegimit të saj, institucioni i porsakrijuar thjesht grumbullon informata vërtet “të besueshme”.
Lëvizja Vetëvendosje ka dështuar në tërësi të jetësojë këtë premtim elektoral, ndonëse e mbajti pushtetin për një gjysmë dekade. Versioni i parë u shpall plotësisht i pavlefshëm nga Gjykata Kushtetuese gjatë qershorit 2024, pikërisht për shkak të shkeljes flagrante të të drejtave pronësore.
Më pas, në një përpjekje të orkestruar për të shmangur debatin thelbësor parlamentar, pushteti ekzekutiv e kaloi ligjin e ndryshuar në dhjetor 2024 brenda një nxitimi procedural absurd, ku u votuan plot trembëdhjetë ligje brenda një seance të vetme. Rezultati ishte sërish fatal: në janar 2026, Kushtetuesja i shfuqizoi të gjitha ligjet për shkak shkeljesh procedurale.
