Arrestohen dy persona, dyshohen se provuan ta bindin një dëshmitar që të mos japë dëshmi në Speciale
Zyra e Prokurorit të Specializuar ka arrestuar Ismet Bahtjarin dhe Sabit Januzin në Kosovë, në bazë të një fletarrestimi dhe urdhri për transferim të lëshuar nga Dhomat e Specializuara në Hagë.
Përmes një komunikate është e bërë e ditur se Bahtjari dhe Januzi janë arrestuar nën dyshimin për lidhje me krime kundër administrimit të drejtësisë përfshirë frikësimin gjatë procedurave penale.
Ndër të tjera, ata dyshohen që u përpoqën të bindin një dëshmitar që të mos japë dëshmi në procedurat e Dhomave të Specializuara.
“Z. Bahtjari dhe z. Januzi u arrestuan në lidhje me krime kundër administrimit të drejtësisë, përfshirë frikësimin gjatë procedurave penale, sipas nenit 387 të Kodit Penal të Kosovës (KPK) 2019, Kodi nr. 06/L-074, dhe pengimin e personave zyrtarë në kryerjen e detyrave zyrtare brenda kuptimit të nenit 401(1), (2) dhe (5) të KPK-së, në shkelje të nenit 15(2) të Ligjit nr. 05/L-53 për Dhomat e Specializuara dhe Zyrën e Prokurorit të Specializuar. Gjykatësi i Procedurës Paraprake ka vendosur se ka dyshime të mirë-bazuara se z. Bahtjari dhe z. Januzi u përpoqën të bindin një dëshmitar që të mos japë dëshmi në procedurat e Dhomave të Specializuara.” - thuhet në komunikatë.
Gjithashtu bëhet e ditur se ata janë transferuar në Objektin e Paraburgimit të Dhomave të Specializuara të Kosovës në Hagë dhe do të dalin para Gjykatësit të Procedurës Paraprake të Dhomave të Specializuara të Kosovës pa vonesë të paarsyeshme.
