Aksion në barnatoret e Pejës: Kapen barna pa banderola, tre të arrestuar
Drejtoria për Hetime e Krime Ekonomike dhe Korrupsion në kuadër të Policisë së Kosovës kanë zhvilluar një aksion në disa barnatore në rajonin e Pejës.
Sipas njoftimit të PK-së në 10 barnatore që janë kontrolluar, në gjashtë prej tyre është gjetur një sasi e konsiderueshme e barnave pa banderola.
Tutje policia ka bërë të ditur se në tri njësi janë gjetur 398 lloje të barnave pa banderola, 40 copë barna me banderola të falsifikuara, një produkt narkotik pa licencë. Të njëjtit biznes i është lëshuar vendimi nga inspektorati farmaceutik për mbyllje të biznesit pasi që ka qenë duke punuar pa farmacist përgjegjës.
Ndërsa në dy njësia të tjera anë gjetur 203 lloje medicinale pa banderola. Dhe në një njësi janë gjetur 8 lloje të medicinale pa banderola.
“Autoritetet kontrollojnë dhjetë barnatore, identifikojnë barna të kondrabanduara, mbyllet një barnatore dhe konfiskohet sasi e barnave të barnave pa banderola, 40 copë barna me banderola të falsifikuara, një produkt narkotik pa licencë.” – thuhet në njoftim.
Njoftimi i plotë:
Policia e Kosovës, Drejtoria për Hetimin e Krimeve Ekonomike dhe Korrupsionit, përkatësisht Sektori për Hetimin e Krimeve Ekonomike sot me datën 22.03.2023 ka zhvilluar një operacion në rajonin e Pejës sipas Planit Operativ të përcaktuar, ku janë kontrolluar dhjetë (10) subjekte biznesore – barnatore për të cilat ekzistonte dyshimi i arsyeshëm se të njëjtat biznese janë duke shitur produkte farmaceutike pa banderola, dhe të njëjtat produkte dyshohet se janë të kontrabanduara dhe të rrezikshme për jetën e qytetarëve.
Ky operacion ka qenë i koordinuar së bashku me Doganën e Kosovës (Njësia e Antikontrabandës) dhe Inspektorët Farmaceutik nga Ministria e Shëndetësisë.
Janë kontrolluar dhjetë (10) barnatore ku në gjashtë (6) prej tyre është gjetur sasi e konsiderueshme e produkteve farmaceutike pa banderola.
- Biznesi 1, në tri (3) njësi janë gjetur: 398 lloje të barnave pa banderola, 40 copë barna me banderola të falsifikuara, një produkt narkotik pa licencë. Të njëjtit biznes i është lëshuar vendimi nga inspektorati farmaceutik për mbyllje të biznesit pasi që ka qenë duke punuar pa farmacist përgjegjës;
- Biznesi 2, në dy (2) njësi janë gjetur: 203 lloje (produkte) medicinale pa banderola;
- Biznesi 3, në një (1) njësi janë gjetur: 80 lloje (produkte) medicinale pa banderola;
Tre (3) pronarë të bizneseve-barnatoreve janë shoqëruar në Stacion Policor dhe janë intervistuar në cilësinë e të dyshuarve lidhur me veprat penale të cekura më lartë.
Në disa barnatore janë pronarët e njëjtë të disa barnatoreve në qytetin e Pejës.
Është konfiskuar sasia e barnave pa banderola që dyshohet se janë të kontrabanduara, me procedura të cilat do të merret më tutje njësia e Antikontrabandës nga Dogana e Kosovës, kurse Sektori për Hetimin e Krimeve Ekonomike (SHKE-DHKEK) nga Policia e Kosovës procedon lëndën në aspektin penal pranë Prokurorisë kompetente.
Pas intervistimit personat e dyshuar me urdhër të Prokurorit kujdestar nga Prokuroria Themelore në Pejë janë liruar në procedurë të rregullt, kurse rastet iniciohen për “Prodhim dhe shpërndarje të produkteve të dëmshme mjekësore” dhe “ Kontrabandim të mallrave”
