Vuçiq takohet me Ramën në OKB: Një përshëndetje e shkurtër me mikun tim
Presidenti serb, Aleksandër Vuçiç dhe Kryeministri Edi Rama, janë takuar mbrëmjen e sotme në Nju Jork, përpara nisjes së punimeve të sesionit të 77-të të Asamblesë së Kombeve të Bashkuara në SHBA.
Lajmin e ka bërë me dije presidenti serb në një postim që ka bërë në llogarinë e tij në Instagram ku ka thënë se shkëmbeu një përshëndetje të vogël më mikun e tij, Edi Rama.
“Një përshëndetje e shkurtër me mikun tim Edi Rama në nisje të sesionit të Asamblesë dhe një mundësi për të shkëmbyer përshtypjet e para për këtë ngjarje të rëndësishme, por edhe për të bërë plane për paraqitje të përbashkëta në takimet gjatë punimeve të Asamblesë”, shkruan Vuçiq.
Krahas fotos së postuar me kreun e qeverisë tonë, Vuçiç nuk ka lënë pa përmendur Ballkanin e Hapur, duke thënë se kjo nismë është e ardhmja e rajonit tonë.
“Një Ballkan i hapur është e ardhmja e rajonit tonë”, thotë presidenti serb.
Këtë javë liderët e gjithë vendeve të botës do të bëhen pjesë e diskutimeve në sesionin e 77-të të Asamblesë së Përgjithshme të Kombeve të Bashkuara.
