Vazhdojnë kritikat ndaj MASHTI-t, Hoti: Miliona euro më shumë nga buxheti për libra për shkak të neglizhencës
Deputeti i Lidhjes demokratike të Kosovës, Avdullah Hoti ka kritikuar përsëri Ministrinë e Arsimit rreth çështjes së librave për nxënësit e shkollave fillore.
Hoti përmes një postimi në Facebook, ka thënë se miliona euro më shumë nga buxheti i shtetit për libra janë shpenzuar si shkak i neglizhencës e i paaftësisë.
Ai tutje ka thënë se librat do t'i kushtojnë buxhetit të shtetit miliona euro më shtrenjtë pasi tani duhet paguar edhe marzhën e shitësve me pakicë të librave.
Postimi i plotë:
Miliona euro më shumë nga buxheti për libra për shkak të neglizhencës e paaftësisë.
Shtëpitë botuese do të marrin nga libraritë, apo shitësit me pakicë, shumën e njëjtë të buxhetit sikurse që ofertuan në tenderin e qeverisë, ndoshta edhe më shumë.
Por, librat do t'i kushtojnë buxhetit të shtetit miliona euro më shtrenjtë pasi tani duhet paguar edhe marzhën e shitësve me pakicë të librave.
Për keqardhje ku ka degraduar qeverisja e vendit. Imagjinoni si do kishin reaguar këta mashtrues sikur kjo të ndodhte në qeveritë paraprake.
Është viti i dytë me radhë që mësimi nuk fillon me rregull. Vitin e kaluar qeveria ishte në luftë me sindikatat dhe u humbën shumë javë mësim. Këtë vit problemi me librat do të pamundësoj nisjen e rregullt të mësimit.
