Tre të vrarë e shtatë të plagosur nga të shtënat në një shkollë të ShBA-së

Të paktën tre persona janë vrarë, përfshirë të dyshuarin, dhe shtatë të tjerë janë lënduar pas të shtënave në një shkollë në Missouri të Shteteve të Bashkuara.

Një person i armatosur hyri në Shkollën e Mesme Qendrore për Arte Pamore dhe Performuese pak pas orës 9 të mëngjesit të hënën sipas kohës lokale.

Dyert e shkollës ishin të mbyllura me çelës dhe nuk ishte menjëherë e qartë se si i dyshuari kishte arritur të hynte brenda, raporton televizioni BBC.

Dëshmitarët thanë se disa njerëz shpëtuan për shkak se sulmuesit iu bllokua arma gjatë sulmit.

I dyshuari është një ish-nxënës 19-vjeçar, i cili u ballafaqua me policinë dhe nuk u mbijetoi plagëve.

Motivi për sulmin në shkollën me rreth 400 nxënës është i paqartë. Një vajzë adoleshente u shpall e vdekur brenda shkollës, ndërsa një grua vdiq në spital, sipas medieve lokale.