“Toka milionëshe, kulmi i korrupsionit”: Surroi me kritika të ashpra për Ramën e Komunën e Prishtinës
Flaka Surroi, gazetare veterane dhe opinioniste, ka shkruar një opinion që është botuar në mediumin “Koha”, ku ka renditur një mori kritikash ndaj qeverisjes në Komunën e Prishtinës, që udhëhiqet nga kryetari Përparim Rama.
Surroi ka shkruar se Prishtina mori primatin e lajmeve këtë javë “me një tashmë të ditur, me një që shkaktoi fatkeqësi dhe me një që i vjen era skandal me përmasa milionëshe.”
Surroi ka shkruar një lidhje me shembjen e kulmit të objektit të Komunës së Prishtinës, që shkaktoi një tragjedi, duke e lënduar keq një qytetare që po kalonte aty pari.
Tutje, opinionistja e njohur ka shtruar një pyetje në lidhje me raportimin e Kohës rreth shkëmbimit të tokave për dy ish-klientë të Ramës.
“Çka fiton qytetari i Prishtinës që prona komunale me vlerë milionëshe t’u dorëzohet dy personave, të cilëve u ka dështuar një projekt? Nga ana tjetër, çfarë fiton Vetëvendosja me faktin se ia krijon kuorumin Ramës për marrjen e një vendimi të këtillë?” – janë pyetjet e Surroit.
