Stërvitje ajrore e KFOR-it me helikopterë, ushtarët amerikanë kryejnë manovra në kufirin me Serbinë
Ushtarë të aviacionit amerikan, të caktuar në Komandën Rajonale Lindje të KFOR-it, kanë realizuar një futje ajrore të trupave këmbësore amerikane në mbështetje të një patrullimi të pavarur në veri të Kosovës, përgjatë kufirit me Serbinë.
KFOR-i ka deklaruar se ky lloj stërvitjeje është i rëndësishëm për ruajtjen e gatishmërisë dhe bashkëveprimit ndërmjet njësive të ndryshme, si dhe për të siguruar efektshmërinë e duhur në operacionet e tij, duke krijuar një mjedis të sigurt për të gjitha komunitetet që jetojnë në Kosovë.
Në një deklaratë, KFOR-i përsëriti se vazhdon të zbatojë mandatin e tij, të mbështetur në Rezolutën 1244 të Këshillit të Sigurimit të Kombeve të Bashkuara, që daton nga viti 1999, për të kontribuar në sigurimin e një mjedisi të qetë dhe të sigurt për të gjithë njerëzit dhe komunitetet në Kosovë. Kjo përfshin garantimin e lirisë së lëvizjes në çdo kohë dhe në mënyrë të paanshme.
Për më tepër, KFOR-i bashkëpunon ngushtë me Policinë e Kosovës dhe Misionin e Bashkimit Europian për Sundimin e Ligjit në Kosovë (EULEX), për të mbajtur sigurinë dhe stabilitetin në përputhje me rolet dhe përgjegjësitë e secilit.
