Sindikata e Policisë kërkon pagesat për orët shtesë: Policët pa pagën e merituar në prag të festës
Sindikata e Policisë së Kosovës ka shprehur shqetësimin e saj për vonesat në pagesën e ndërrimeve të natës dhe orëve shtesë për zyrtarët policorë.
Sipas sindikatës, pavarësisht përkushtimit dhe sakrificës së punonjësve të policisë, ata ende nuk kanë marrë pagën e plotë për punën e kryer.
“Në prag të festës, policët nuk e kanë marrë pagën e merituar, e cila është e domosdoshme për planifikimin e angazhimeve të tyre familjare dhe personale. Kjo situatë ndikon drejtpërdrejt në mirëqenien e tyre dhe ka krijuar pasiguri në lidhje me realizimin e angazhimeve të përditshme. Pavarësisht përkushtimit dhe sakrificës së vazhdueshme të zyrtarëve policorë, deri më tani nuk kemi marrë asnjë komunikim zyrtar nga Qeveria për këtë çështje.” - thuhet në reagim.
Në një reagim për media, Sindikata ka theksuar se kjo vonesë ka ndikuar negativisht në mirëqenien e policëve, veçanërisht në prag të festave, duke krijuar pasiguri financiare për ta dhe familjet e tyre. Deri më tani, nuk ka pasur një komunikim zyrtar nga Qeveria për këtë çështje.
Sindikata e Policisë i ka bërë thirrje Ministrisë së Financave që të ekzekutojë menjëherë pagesat e prapambetura, duke siguruar kompensimin e plotë për ndërrimet e natës dhe orët shtesë. Sipas tyre, kjo është e nevojshme për të ruajtur motivimin dhe angazhimin e zyrtarëve policorë në shërbimin ndaj qytetarëve dhe sigurisë publike.
