ShBA i kërkon Izraelit të ndjekë rrugët diplomatike pas përshkallëzimit të sulmeve me Hezbollahun
Zëdhënësi i Këshillit të Sigurisë Kombëtare të Shtëpisë së Bardhë, John Kirby, tha të dielën, zyrtarët amerikanë po vazhdojnë t'i kërkojnë Izraelit të de-përshkallëzojë, mes tensioneve në rritje në veri, pas sulmeve ndërkufitare kundër grupit militant Hezbollah të mbështetur nga Irani, shkruan CNN.
Është pikëpamja e Shtëpisë së Bardhë se përshkallëzimi ushtarak nuk do ta ndihmojë qeverinë e kryeministrit izraelit Benjamin Netanyahu të arrijë qëllimet e saj për të rivendosur një ndjenjë normaliteti për izraelitët në kufirin e Libanit, theksoi Kirby.
“Ne nuk besojmë se përshkallëzimi i këtij konflikti ushtarakisht është mënyra më e mirë për t'i rikthyer ato familje në Kibuttzes e tyre, në shtëpitë e tyre, në jetën e tyre. Ne ende besojmë se ka kohë dhe hapësirë që diplomacia të funksionojë”, tha Kirby në “Fox News Sunday”.
Kirby tha se zyrtarët amerikanë janë të përfshirë në përpjekje "të gjera", kur u pyet në "ABC This Week" se çfarë po bëjnë SHBA për të çuar përpara përpjekjet diplomatike.
“Ne kemi qenë të përfshirë në diplomaci të gjerë dhe mjaft bindëse. Në fakt, një nga të dërguarit tanë, Amos Hochstein, të cilin mendoj se e njihni, ishte në rajon vetëm pak ditë më parë. Ne me siguri do t'i vazhdojmë ato biseda sa më mirë që mundemi. Dhe ne po flasim me të dyja palët këtu”, tha ai.
Kirby shtoi se ata po vazhdojnë të shikojnë me shqetësim tensionet në rritje.
“Ne po shikojmë me shqetësim përshkallëzimin e tensioneve në rajon dhe përtej kufirit këtu në javën e fundit apo më shumë. Dhe ne nuk besojmë, vazhdojmë të mos besojmë, se veprimi kinetik, veprimi ushtarak, nga secila palë është me të vërtetë në interesin më të mirë të secilës palë […] Këtu ka një rrugë më të mirë përpara”, tha Kirby.
