Sadiku i LDK-së: Kurti e tradhtoi Osmanin edhe pse kishin aleancë
Deputeti i LDK-së, Ermal Sadiku, ka vlerësuar se Albin Kurti është lider që nuk e mban fjalën.
Ai ka bërë me dije se lideri i VV-së në fund e ka tradhtuar presidenten Vjosa Osmanit.
Në emisionin “Info Nata” në Tevë1, Sadiku ka thënë se Kurti këtë e ka bërë edhe pse me Osmanin për vite të tëra kishte një aleancë.
“E shihni edhe vetë se Vjosa Osmani ka pasur një aleancë të bukur dhe të suksesshme me z. Kurti, por në fund, si të themi, z. Kurti nuk e mbajti atë fjalën e vet dhe e tradhtoi Vjosa Osmanin në momentin e fundit. Besoj që tashmë e kanë kuptuar të gjithë, sepse nuk e propozoi për kandidate për presidente”, ka thënë Sadiku.
Sipas tij, nëse Osmani do të ishte propozuar për presidente do t`i merrte votat e nevojshme.
“Po të propozohej Vjosa Osmani, pa marrë parasysh se si do të votonte secili deputet i LDK-së, me gjithë ato vota ajo do të zgjidhej. Unë mendoj që 80 vota do të ishin bërë për Osmanin, po të ishte propozuar. Asnjë nga partitë politike, e aq më pak LDK-ja, nuk do të donte të shkonim në zgjedhje”, është shprehur ai.
