Rashiti: Belgin Jashari u kthye në flamur shprese për të gjithë të rinjtë e Kosovës

Deputeti shqiptar në Kantonin e Bernës në Zvicër, Korab Rashiti, ka reaguar për rastin e futbollistit Belgin Jashari, të cilin e publikoi gazeta Nacionale.

Ai ka thënë se Belgin Jashari nuk është më vetëm futbollist i ri, por flamur shprese për të gjithë të rinjtë e Kosovës.

Postimi:

Historia e Belgin Jasharit është historia e një djali të ri, që me një zemër të pastër dhe një dashuri të pafundme për futbollin, u përball me errësirën më të rëndë të shoqërisë sonë. Në çdo ndeshje, në çdo prekje të topit, ai jo vetëm që duhej të luftonte për ëndrrën e tij, por edhe për dinjitetin e tij si qenie njerëzore, duke përjetuar fyerje raciste, diskriminim, poshtërime dhe, jo rrallëherë, edhe dhunë fizike. Dhimbja e tij nuk ishte vetëm ajo e trupit të lënduar, por ajo më e thella – dhimbja e një shpirti të ri që pyeste veten: A ka vend për mua në vendin tim?

Rasti i tij, i sjellë në dritë nga gazeta Nacionale, preku mijëra zemra dhe bëri që shumëkush të hapë sytë ndaj një të vërtete të hidhur që për shumë kohë ishte injoruar: se paragjykimet dhe urrejtja ndaj pakicave në Kosovë nuk janë vetëm plagë të së kaluarës, por plagë ende të hapura. Por, ajo që pasoi, ishte diçka e rrallë dhe prekëse: një valë e madhe solidariteti, një zë i fuqishëm që tha "Mjaft!" dhe që përqafoi Belginin si birin e vet.

Sot, Belgin Jashari nuk është më vetëm një futbollist i ri. Ai është kthyer në një flamur shprese për të gjithë të rinjtë e Kosovës. Ai është dëshmia e gjallë se ëndrrat nuk duhet të shuhen nga urrejtja, dhe se guximi dhe pasioni mund të thyejnë muret më të larta të padrejtësisë. Me historinë e tij, Belgin na mëson të gjithëve një të vërtetë të thjeshtë por jetike: nëse je i vërtetë, nëse dashuron me gjithë shpirt atë që bën, asgjë nuk është e pamundur në Kosovë. Dhe askush, kurrë, nuk duhet të ndiejë se është i huaj në vendin e vet. Shpresa jeton, dhe ashensori social duhet të funksionojë për secilin fëmijë që sot guxon të ëndërrojë.