Punëtorët e RTK-së pa paga që dy javë, AGK-ja thirrje qeverisë për ndarjen e buxhetit

Punëtorët e RTK-së janë pa paga tash e dy javë.

Asociacioni i Gazetarëve të Kosovës i ka bërë thirrje qeverisë që t’ia ndajë buxhetin televizionit publik.

Postimi:

Punëtorët e RTK-së - dy javë pa paga, thirje Qeverisë për ndarjen e buxhetit

Asociacioni i Gazetarëve të Kosovës (AGK) është thellësisht i shqetësuar që 700 punëtorët e RTK-së vazhdojnë të mbesin pa pagë për muajin korrik. AGK-ja është e brengosur për mirëqenien ekonomike të gjithë kolegëve, që nuk janë paguar për punën e tyre, që vazhdojnë ta kryejnë edhe gjatë muajit gusht.

AGK-ja e fton Menaxhmentin e RTK-së që të intensifikojë përpjekjet për të siguruar buxhetin, dhe të jetë transparent për veprimet e veta me të punësuarit e RTK-së.

AGK-ja e sheh mosalokimin e buxhetit për pjesën e dytë të vitit për RTK-në, si formë të presionit të shtuar politik ndaj Transmetuesit Publik nga ana e Qeverisë në detyrë Kurti.

Është koha e fundi që Qeveria të eksplorojë të gjitha mundësitë ligjore për të alokuar mjetet që i takojnë RTK-së.

AGK-ja qëndron në solidaritet me kolegët e RTK-së dhe njeh punën e tyre të rëndësishme për informim në interes të publikut.