PSD-ja e mbështet protestën kundër Speciales, Molliqaj: Kuptimi i drejtësisë është zhbërja e kësaj gjykate
Partia Socialdemokrate ka dalë në mbështetje të protestës kundër Gjykatës Speciale, e cila është thirrur nga organizatat e dala nga lufta e UÇK-së.
Kryetari i kësaj partie, Dardan Molliqaj, ka vlerësuar se besnikëria e pakusht ndaj historisë së luftës çlirimtare është nga sprovat më të rëndësishme të gjeneratës tonë.
Në profilin e tij në “Facebook”, ai ka shkruar se për PSD-në kuptimi i drejtësisë është zhbërja e kësaj gjykate.
“Partia Sociademokrate mbështet protestën e veteranëve të Ushtrisë Çlirimtare të Kosovës kundër Gjykatës Speciale. Besnikëria e pakusht ndaj historisë së luftës çlirimtare është nga sprovat më të rëndësishme të gjeneratës tonë. Prandaj kjo është kauzë përtej çdo llogarie. Prandaj nuk duhet të kursehemi. Për ne kuptimi i drejtësisë është zhbërja e kësaj gjykate. Për ta gjykuar UÇK-në, së pari duhet ta dyshojmë. Asnjë lloj verdikti që e supozon UÇK-në si të fajshme nuk sjellë drejtësi, pavarësisht përmbajtjes përfundimtare të tij. Sepse UÇK nuk mund të gjykohet. Ajo është kushti dhe mundësia për të pasur drejtësi në të ardhmen”, ka shkruar Molliqj.
