Presidenti i Shqipërisë Bajram Begaj uron besimtarët e krishterë për Krishtlindje

Presidenti i Shqipërisë, Bajram Begaj, ka uruar besimtarët e krishterë me rastin e festës së Krishtlindjes.

Përmes një mesazhi në Facebook, Begaj theksoi se kjo festë përfaqëson vlerat e besimit, të dashurisë dhe solidaritetit, transmeton Klankosova.tv.

Mes të tjerash, presidenti uroi që kjo Krishtlindje të sjellë mirësi në familje, dashuri, përkujdes dhe dhembshuri për të pamundurit, si dhe një të ardhme më të mirë për Shqipërinë.

“Për besimtarët e krishterë të Shqipërisë, kjo festë e shenjtë përfaqëson vlerat e besimit, të dashurisë dhe solidaritetit, vlera që kanë qenë gjithmonë pjesë e identitetit tonë dhe e bashkëjetesës ndërfetare. Ato na kujtojnë rëndësinë e respektit për njëri-tjetrin dhe të kujdesit për më të dobëtit në shoqëri”, ka shkruar Begaj.

“Gëzuar! Uroj që kjo Krishtlindje të sjellë mirësi në familjet tuaja, dashuri, përkujdes dhe dhembshuri për të pamundurit, si dhe një të ardhme më të mirë për vendin tonë”.