Përfshihet nga zjarri një banesë në Gjilan, vdes një 50 vjeçar
Një banesë është përfshirë nga zjarri në Gjilan sot rreth orës 9:00 të mëngjesit. Si pasojë një person i moshës 50 vjeçare ka ndërruar jetë.
Zëdhënësi i Policisë për rajonin e Gjilanit Ismet Hashani e ka konfirmuar përExpress, rastin.
“Drejtoria rajonale e Policisë, stacioni policor në Gjilan, sot më 08.07.2023 në orën 08:45 nga qendra emergjente 112 është pranuar një informatë se nga një banesë afër tregut të gjelbër kati i katërt është duke dalë tym. Janë angazhuar njësitet patrulluese. Njësitet e zjarrfikësve me urgjencë kanë dalë në vend të ngjarjes”, ka thënë Hashani.
Sipas tij, janë evakuuar të gjithë banorët e banesave përreth për çështje sigurie.
“Hetuesit rajonalë kanë dalë në vendin e ngjarjes bashkë me prokurorin e shtetit. Nga hetimet e para njoftohet se në banesë është gjetur një person pa shenja jete i gjinisë mashkullore rreth 50-vjeç . Prokurori i shtetit ka urdhëruar që trupi i pajetë të dërgohet në IML”, ka deklaruar ai.
