Pamje: Si shpëtoi mrekullisht pa rënë nga ura e lartë shoferja e një kamioni në ShBA
Në një video të publikuar rishtazi shihet se si një shofere kamioni kishte shpëtuar mrekullisht pa rënë nga një urë e lartë në Louisville të ShBA-së në mars, pasi ishte aksidentuar me një veturë dhe kamioni kishte mbetur i varur në urë. Shoferja shihet shumë e frikësuar.
Rreth orës 12 e 15 minuta, në mesditën e 1 marsit, ekipet emergjente kishin shkuar me nxitim në vendin e ngjarjes, në urën “Clark Memorial Bridge”, që ndodhet mbi Lumin Ohio, pasi kamioni i kishte goditur rrethojat dhe për pak nuk kishte rënë në ujë.
Në pamje shihet se si një punëtor i shpëtimit e shpëton shoferen e kamionit. Të dy tërhiqen me litar.
Sipas një mediumi lokal, vozitësi i automjetit që e goditi kamionin, Trevor Branham, është ngarkuar me katër akuza për rrezikim të paarsyeshëm si dhe për operim të një automjeti me motor me licencë të pezulluar, raporton televizioni “Fox News”.
