Pamje: Dakun nuk e ndal askush - shënon një tjetër gol për Muran në Slloveni
Celje eliminoi në 1/16-at e Kupës së Sllovenisë Muran duke e mposhtur 2:1, por Daku edhe sot doli me kokën lart, pasi shënoi golin e radhës, duke u shndërruar në një “përbindësh goli” në Slloveni.
Goli i 14-të në sezon ishte ky që shënoi Mirlind Daku sot për ekipin slloven, Mura. Edhe pse ishte gol që ngushtoi disavantazhin e ekipit të tij, duke mos shërbyer shumë në rezultatin përfundimtar, prapëseprapë sulmuesi kosovar kreu detyrën, ashtu siç po e kryen në suaza të përjavshme.
Në minutën e 52-të ai pranoi një pasim tokazi nga krahu i majtë dhe me një zhagitje prej një “9”-shi klasik, ai zgjati këmbën dhe shënoi për 1:2.
Mura u përpoq që ta barazojë rezultatin deri në fund të ndeshjes, por sulmet e shumta nuk u finalizuan dot me një tjetër gol shënimi.
Mirlind Daku është në huazim te Mura, pasi kartonin e tij e zotëron Osijeku. Megjithëse, si në Slloveni, ashtu edhe në Kroaci, flitet shumë nga mediet respektive për një transferim të sulmuesit kosovar në futbollin perëndimor që në afatin kalimtar të janarit.
