Osmani takohet me kryetarin e KQZ-së, diskutojnë për përgatitjen për zgjedhjet e reja në veri
Presidentja e Kosovës, Vjosa Osmani, ka takuar kryetarin e Komisionit Qendror Zgjedhor (KQZ), Kreshnik Radoniqin.
Sipas njoftimit të Zyrës së Presidentes, në këtë takim është diskutuar për përgatitjet për mbajtjen e zgjedhjeve në veri të vendit.
“Presidentja shprehu besimin e saj se KQZ-ja, si institucion përgjegjës për administrimin e votimit, do t'i ndërmarrë të gjitha veprimet e duhura dhe brenda afateve që ky proces të realizohet duke respektuar këtë të drejtë të qytetarëve në përputhje me procedurat dhe legjislacionin në fuqi.” – thuhet ndër të tjera.
Njoftimi i plotë:
Presidentja Vjosa Osmani priti në takim kryetarin e KQZ-së, Kreshnik Radoniqi
Presidentja e Republikës së Kosovës, Vjosa Osmani, ka pritur sot në takim kryetarin e Komisionit Qendror të Zgjedhjeve, Kreshnik Radoniqi.
Në takim u diskutua lidhur me përgatitjet që po bëhen lidhur me kërkesën për zgjedhje të reja në veri të vendit, nëpërmjet mbledhjes së 20% të nënshkrimeve të trupit votues, ashtu siç parashihet në Ligjin për Vetëqeverisje Lokale dhe Udhëzimin Administrativ të hartuar për këtë çështje. Presidentja shprehu besimin e saj se KQZ-ja, si institucion përgjegjës për administrimin e votimit, do t'i ndërmarrë të gjitha veprimet e duhura dhe brenda afateve që ky proces të realizohet duke respektuar këtë të drejtë të qytetarëve në përputhje me procedurat dhe legjislacionin në fuqi.
