Organizata ndërkombëtare të mediave në takim me Kurtin: "Nuk na u zotua të dënojë sulmet ndaj gazetarëve"
Rënia e lirisë së medias në Kosovë që nga viti 2023 kërkon ndërhyrje të menjëhershme politike, paralajmërojnë disa organizata ndërkombëtare partnere të Këshillit të Evropës
Pas vizitës dyditore në Prishtinë, delegacioni i këtyre organizatave konstatoi përkeqësim të standardeve mediatike.
Megjithëse ata konstatojnë se ekziston pluralizëm dhe pak dhunë fizike ndaj gazetarëve, zhvillimet e fundit lidhen me veprimet e partisë Vetëvendosje.
Ligji për KPM-në, i rrëzuar si antikushtetues, presioni ndaj Radio Televizionit të Kosovës dhe retorika denigruese ndaj gazetarëve përmenden si faktorë kryesorë.
Këto zhvillime kanë dëmtuar reputacionin e Kosovës si lider rajonal në lirinë e medias në procesin e integrimit evropian.
Ndërkohë, sipas tyre, sistemi i drejtësisë ka treguar përmirësime, me trajtim më efikas të rasteve dhe strategji të reja nga Këshilli Gjyqësor i Kosovës.
Sulmet fizike kanë rënë, por rastet e fyerjeve dhe sulmeve online ndaj gazetarëve, sipas Asociacionit të Gazetarëve të Kosovës, kanë arritur kulmin në 2025.
Delegacioni kritikoi përdorimin e narrativave që i paraqesin gazetarët si “agjentë të huaj”, duke thelluar klimën armiqësore.
Në takimin me Albin Kurtin, u kërkua distancim nga gjuha përçarëse, pa një zotim publik nga ai, thuhet në komunikatë.
"Gjatë një takimi me Kryeministrin, delegacioni i bëri thirrje drejtpërdrejt atij, ministrave të tij dhe zyrtarëve të partisë që të jepnin shembull për shoqërinë duke dënuar dhe duke u përmbajtur nga përdorimi i shpifjeve të papranueshme, veçanërisht gjuhës përçarëse kundër gazetarëve. Kryeministri nuk u zotua të dënonte publikisht sulme të tilla."
Sfidat strukturore, përfshirë ndikimin politik dhe mungesën e transparencës, vazhdojnë të dobësojnë gazetarinë hulumtuese.
Misioni kërkoi reforma ligjore në përputhje me standardet evropiane dhe paralajmëroi se besimi demokratik duhet rindërtuar urgjentisht.
