Një spital në Holandë konfirmon një pacient të infektuar me hantavirus, besohet se ishte pasagjer në anije
Një pacient në një spital të Holandës ka dalë pozitiv në testin për hantavirus.
Në një deklaratë të publikuar në uebfaqen e vet, Qendra Mjekësore Universitare e Leiden-it tha se individi “ka dhënë leje për shpërndarjen e kësaj informate”.
Spitali nuk e identifikoi pacientin, raporton televizioni BBC.
Më herët, televizioni publik britanik raportoi se në atë spital besohet se është duke u trajtuar britaniku 56-vjeçar, Martin Anstee, i cili dje u evakuua nga anija “MV Hondius”. Anstee i ka thënë BBC-së se është në gjendje të mirë.
Organizata Botërore e Shëndetësisë të enjten tha se nuk bëhet fjalë për një pandemi si ajo e koronavirusit, sepse hantaviruset përhapen “shumë, shumë më ndryshe” dhe përmes kontaktit të zgjatur.
Duke e marrë parasysh periudhën e inkubimit, që mund të zgjatë deri në gjashtë javë, mund të raportohen raste të reja, përpos tetë rasteve të dyshimta, pesë prej të cilave tashmë janë konfirmuar.
Megjithatë, drejtori i Përgjithshëm i OBSh-së tha se rreziku ndaj shëndetit publik është i ulët dhe kjo vlen edhe për Ishujt Kanari, ku pritet të ankorohet anija me të cilën po lundronin të infektuarit.
