Ngërçi pas 9 shkurtit, Haziri: Përvojat e kaluara penguan bashkëpunimin politik

Nënkryetari i Lidhjes Demokratike të Kosovës, Lutfi Haziri, ka folur për vështirësitë e bashkëpunimit politik pas zgjedhjeve parlamentare të 9 shkurtit, të cilat nuk prodhuan një qeveri të re dhe çuan vendin në zgjedhje të jashtëzakonshme më 28 dhjetor.

Zgjedhjet e dhjetorit shënuan një fitore historike për Lëvizjen Vetëvendosje të Albin Kurtit, ndërsa LDK-ja u rendit e treta me rreth 13 për qind të votave. Analistët e kanë lidhur këtë rezultat me një qëndrim të paqartë politik të LDK-së gjatë vitit 2025.

Megjithatë, Haziri ka theksuar se mungesa e bashkëpunimit pas zgjedhjeve të shkurtit lidhej me përvojat e kaluara të partisë së tij me Vetëvendosjen dhe Partinë Demokratike të Kosovës. “Ne kemi pasur bashkëpunime me VV-në si opozitë dhe në qeveri, por ato nuk kanë funksionuar”, tha ai, duke përmendur përfundimin e qeverisë së përbashkët me mocion mosbesimi dhe shkarkimin e njëanshëm të kryeministrit.

Sipas Hazirit, këto përvoja nuk i lejonin LDK-së të dilte para qytetarëve me premtime të reja për bashkëpunim.