Muhaxheri: Kurti po i gënjen qytetarët për autostradën e Dukagjinit
Zëdhënësi i Lidhjes Demokratike të Kosovës, Gazmend Muhaxheri, ka shprehur keqësimin e tij për mënyrën se si Qeveria e Albin Kurtit po menaxhon projektet infrastrukturore në Kosovë.
Muhaxheri ka folur për rastin e autostradës së Dukagjinit, që Qeveria ka preferuar zgjerimin e rrugës ekzistuese e jo ndërtimin e autostradës.
Sipas tij, zgjerimi i rrugës nuk kushton më lirë, sepse vetëm një segment kushton 40 milionë euro.
“Rrugën e vjetër duhet të shpronësohet prapë, të zgjerohet prapë dhe kryeministri ka thënë se do të na kushtojë më lirë. Pse ka me na kushtuar më lirë se ajo ka qenë e projektuar më shtrenjtë dhe tash kanë thënë hajde ta bëjmë një segment, dhe po ua shesin qytetarëve si ne kemi me punuar më lirë. Çka ke me punuar më lirë, e ke vendosur vetëm një segment 40 milionë euro dhe ende nuk e ke nis”, ka thënë ai në “Pressing” të T7.
Muhaxheri vlerëson se kjo qeveri nuk ka një program të qartë dhe mungon kapaciteti për të menaxhuar projektet në mënyrë efikase.
“I kanë besuar liderit që mund t’i kryejë punët me shkop magjik, por po shihet që s’ka shkop magjik. Problem i parë i kësaj qeverie ka qenë që nuk kanë pasur program dhe pastaj u pa që nuk kanë as njerëz për të qeverisur. Për 4 vjet këta nuk kanë bërë asgjë, sidomos në infrastrukturë”, tha Muhaxheri në Pressing.
