Kusari-Lila: I kam propozuar Arben Gashit të LDK-së që të bëhet zëdhënës i VV-së

Shefja e Grupit Parlamentar të Lëvizjes Vetëvendosje, Mimoza Kusari-Lila ka reaguar pas deklaratave të shefit të Grupit Parlamentar të Lidhjes Demokratike të Kosovës, Arber Gashi, i cili tha se ka deputetë nga partia në pushtet që po duan të largohen.

Kusari-Lila për RTV21 ka ironizuar duke thënë se “i ka propozuar Gashit që të bëhet zëdhënës i LVV-së".

“Duket se z. Gashi e ka një obsesionim me Grupin Parlamentar të Lëvizjes Vetëvendosje. Unë i kam propozuar që nëse është i interesuar mund të marrë pozitë të përfaqësuesit të grupit në kuptimin e zëdhënësit sepse merret vazhdimisht me komente se çfarë ndodh brenda në grup. Deklaratat e tij janë absolutisht të pavërteta dhe të paqëndrueshme”, ka thënë ajo.

Ndërkaq, Gashi ditë më parë ka paralajmëruar rënien e Qeverisë Kurti 2, duke thënë se janë tetë deputetë ë kanë shprehur interesim që të dalin në LDK.

“Ka indikacione, ka lëvizje dhe interesime, janë tetë deputetë që kanë shprehur interesim për të ardhur në koalicion”, ka thënë Gashi.