Kina shënon rekord të rasteve me Covid-19 që nga fillimi i pandemisë
Kina e ka regjistruar shifrën më të lartë ditore të rasteve me Covid-19 që nga fillimi i pandemisë pavarësisht nga masat e rrepta kufizuese.
Virusi është përhapur në disa qytete të rëndësishme, përfshirë kryeqytetin Pekin dhe qendrën tregtare jugore, Guangzhou, raporton televizioni BBC.
Të mërkurën, ky shtet regjistroi 31.527 raste – dukshëm më shumë se rreth 28.000 rastet e regjistruara në prill, kur qyteti më i madh kinez, Shangai, ishte në izolim.
Politika zero Covid e Kinës ka shpëtuar jetë në shtetin me 1,4 miliard banorë, por gjithashtu u ka dhënë goditje ekonomisë dhe jetës së njerëzve të rëndomtë.
Sidoqoftë, vala e ngritur e rasteve të reja vjen disa javë pas lehtësimit të disa masave kufizuese. Autoritetet e zvogëluan kohën e izolimit për kontaktet e ngushta të të infektuarve nga shtatë ditë në qendra shtetërore në pesë ditë, ndërsa tri ditë në shtëpi. Autoritetet gjithashtu nuk i regjistronin më kontaktet dytësore, masë që u mundësoi shumë njerëzve ta shmangnin karantinimin.
Zyrtarët kinezë kanë njoftuar se qyteti qendror, Zhengzhou, do të zbatojë izolim për gjashtë milionë banorë nga e premtja.
